Armando Sadiku tregon pse u takua me Gaz Demin

15 Qershor 2021, 06:04, Sport CNA

Armando Sadiku tregon pse u takua me Gaz Demin

Një foto pak ditë më parë mes Armando Sadikut dhe presidentit të Partizanit, Gazment Demi, bëri që shumë në Kategorinë Superiore të nisin të ëndërrojnë për rikthim hipotetik të bomberit me fanellën e të kuqve.

Në një intervistë për ?Panorama Sport?, sulmuesi kuqezi flet për atë bisedë me numrin një të skuadrës kryeqytetase, për aventurën një Bolivi, synimet dhe objektivat, krahas dështimeve dhe zhgënjimeve të deritanishme. Armando Sadiku flet edhe për Kombëtaren. Rezervohet për dy ndeshjet e fundit, por nuk e fsheh lidhjen që ka me të. I paharrueshëm për sulmuesin edhe goli historik në Francë, pesë vite më parë ndaj Rumanisë.

Sadiku, si po ju shkon aventura në Bolivi?

Për momentin, çdo gjë po shkon shumë mirë. Kalova vetëm katër muaj tek ekipi i Bolivarit, një eksperiencë krejt e re për mua. Jemi në vend të parë në kampionat. Për ne, ishte zhgënjim sepse nuk siguruam dot pjesëmarrjen në grupet e Kupës Libertadores. Megjithatë, objektivi kryesor mbetet fitimi i kampionatit.

A do të vazhdoni që të jeni pjesë e Bolivarit?

Po! Sigurisht që po.

Së fundmi jeni parë në Shqipëri, i fotografuar me presidentin e Partizanit. Ka vend për të shpresuar kthimin në Superiore?

Jam në Shqipëri me pushime për të takuar familjen time. Jemi takuar me presidentin e Partizanit rastësisht në të njëjtin restorant. Jo, nuk ka asgjë më shumë se kaq.

Si e keni parë Kombëtaren në dy ndeshjet e fundit miqësore?

Nuk mund të jap një përgjigje për këtë.

A ju mungon Kombëtarja?

Normalisht që më mungon Kombëtarja. Do të doja gjithmonë që të isha pjesë e grumbullimit, e listës. Realisht do të doja që të thërritesha gjithmonë në Kombëtare. Megjithatë, e shoh pozitivisht këtë gjë që do të kthehem sërish në Kombëtare dhe do të mundohem që të jap maksimumin te Bolivari dhe të shënoj sa më shumë gola, në mënyrë që ekipi të arrijë objektivat dhe të dalë kampion. Në të njëjtën kohë, edhe unë që të rikthehem në Kombëtare.

Çfarë ju mungon më së shumti?

Më mungon gjithçka: grumbullimet, ekipi, ambienti dhe shokët me të cilët kemi bërë edhe historinë bashkë.

Po nga futbolli europian, çfarë ju mungon më së shumti?

Një nga kampionatet më të bukura që kam luajtur në karrierën time është kampionati spanjoll. Kështu që, nëse do të kem mundësinë që të kthehem edhe një herë tjetër të luaj në Spanjë, do ta bëja me kënaqësi. Është kampionati im i preferuar. Për mendimin tim, është një nga kampionatet më të bukura në botë dhe realisht do të më pëlqente që të rikthehesha një ditë për të luajtur sërish atje.

Pesë vite më parë, në këtë muaj, keni bërë historinë me Kombëtaren. Si e kujtoni Europianin në Francë dhe golin historik ndaj Rumanisë?

Europiani është një moment i paharrueshëm për mua, sepse ishte një nga arritjet më kulmore të karrierës sime. Sot kur e shikoj nëpër video atë gol ndaj Rumanisë, gjithmonë emocionohem, sado që e kam parë aq shumë herë dhe ndjehem shumë krenarë për çfarë kemi bërë atje.

Këtë Europian me kë bëni tifo?

Jam me Spanjën.

Po ekipet favorite, sipas jush, cilat janë?

Për mendimin tim janë tri: Gjermania, Spanja dhe Franca.