Për futjen në BE, ndryshimi duhet të vijë që nga rinia

18 Prill 2018, 12:45, Opinione CNA

Nga Enrik Braho

*Ditën e djeshme Komisioni Europian rekomandoi që BE-ja të fillojë bisedimet për anëtarësimin me Shqipërinë, ndërsa në qershor pritet që të shprehet Këshilli lidhur me këtë rekomandim.

Por ky ishte një ndër hapat e parë të një rruge të gjatë e cila përfundon me ditën e shumëpritur, e cila mund të jetë në një të ardhme të largët, ditën kur shteti Shqiptar të hyjë zyrtarisht në BE. Një ëndërr dhe dëshirë e Kombit Shqiptar, sidomos e rinisë së saj. Por që një ëndërr dhe dëshirë të realizohet duhet shumë punë dhe sakrificë.

Sot, më shumë se kushdo tjetër, futjen në BE e kërkon rinia shqiptare. Futja në BE i përket të ardhmes dhe “e ardhmja është e rinisë” një thirrje të cilën e dëgjojmë shpesh nga politikanë, media dhe organe të ndryshme, por rinia shqiptare duhet të dëgjojë dhe thirrjen nga një i ri shqiptar “koha është te unë dhe vendi më është lënë amanet mua” e cila nënkupton se sot rinia duhet të fillojë ta përgatisë të ardhmen dhe se ajo është amanet për të. Më shumë se e ardhmja është e sotmja. Duke u inkuadruar në të tashmen, bëhet e ardhmja e vendit. Rinia shqiptare duhet të kuptojë se luan një rol të rëndësishëm për futjen në BE. Fati i Shqipërisë mund të ndryshojë nga rinia.

Rini, kjo fjalë e cila nënkupton persona energjik, të vullnetshëm, të guximshëm pozitivë, fitues, të gëzueshëm, persona me një qëllim në jetë me plot ëndrra dhe dëshira. Por nëse do të përballesh me rininë shqiptare zhgënjimi do të jetë i pashmangshëm, teksa do të shohësh një rini rrjetesh sociale, kafenesh dhe bastesh sportivë. Ëndrra dhe dëshira e vetme e kësaj rinie është largimi nga atdheu, ku vitet e fundit numri i largimit të shqiptarëve nga vendi i tyre është i përafërt me atë të sirianëve të cilët jetojnë në një vend lufte. Pesimizmi është sëmundja më e madhe që e ka prekur këtë rini.

Çdo i ri shqiptar që kërkon futjen në BE duhet t’i drejtojë disa pyetje vetes dhe të ndërgjegjësohet: A ka shteti Shqiptar një rini të duhur për t’u bërë një vend anëtar i BE-së? A pranon BE-ja të bëjë pjesë të saj një vend i cili ka një numër të madh kafenesh dhe bastesh sportivë dhe një numër të madh të rinjsh të papunë? A Pranon BE-ja të bëjë pjesë të saj një rini e cila nuk proteston për të kërkuar më mirë për të dhe për vendin e saj?

Rinia shqiptare e cila kërkon futjen e vendit të saj në BE duhet të ndryshojë. Duhet të fillojë të ndiejë sadopak ndjenjën e patriotizmit dhe të fillojë të punojë edhe në vendin e saj jo vetëm në vend të huaj, pavarësisht se të ardhurat janë më të vogla. Duhet të ngrejë zërin e saj duke protestuar nëpër sheshe, duke protestuar për të drejtat e saj dhe jo duke krijuar një ngjarje proteste në rrjetet sociale. Duhet të kuptojë se për të mirën e vendit të tij nuk duhet të bëhet bashkë me këtë politikë të korruptuar por t’i dalë kundra saj. Një i ri shqiptar sot duhet të fillojë të studiojë dhe të arsimohet duke u bërë tamam në kuptimin e mirëfilltë të fjalës student dhe jo duke qenë një “parazit” në shkollë.

Është shumë e lehtë për t’ia hedhur fajin dikujt tjetër por rinia shqiptare duhet të shikojë në radhë të parë fajin tek vetja e saj. Vërtet shteti shqiptar ka shumë të rinj të papunë por çfarë po bën rinia sot kundër qeveris që nuk po hap vende të reja pune? Sot Shqipëria ka një nivel të lartë korrupsioni dhe rinia është kundra kësaj por çfarë po bën për ta luftuar këtë fenomen? Zgjedhin rrugën më të lehtë, largimin nga atdheu.

Rinia shqiptare e ka dëshmuar një herë se mund të ndryshojë fatet e vednit të saj kur në vitin 1991 rrëzoi sistemin diktatorial. Mund të jetë pikërisht kjo rini e cila mund ta fut shtetin shqiptar në rrugën e duhur për t’u anëtarësuar në BE.

Të gjitha ndryshimet që u përmendën më lart duhet t’i bëjë çdo i ri shqiptar në qoftë se do të mirën e Shqipërisë pasi nata nuk mund të ndriçohet vetëm me disa yje./CNA.al