Adios LSI

28 Mars 2018, 13:32, Opinione CNA

Prof. Dr. Arben Manasterliu

Dikur ishte i zgjuar ai apo ajo që kalonte sa më parë tek LSI-ja sepse do kishte përfitime. LSI-ja të ofronte punë, e siguri pasi nuk do dilte asnjëherë në opozitë. Sot është i zgjuar ai që largohet sa më parë nga kjo parti. Përse? Sepse pas një viti nuk do ketë më LSI.

?Bye bye ? Adios LSI.?

Këtë e kanë kuptuar këshilltarët nga mbarë bashkitë e Shqipërisë që tashmë janë larguar, e shumë të tjerë që do largohen së shpejti. E kanë kuptuar të rinjtë e LRI-së që dikur mbushnin stadium e sot me vështirësi mbushin një sallë. E kanë kuptuar gratë që dikur shkonin të krehura e zbukuruara që të dukeshin sa më shumë në fotot që hidheshin në facebook me Ilirin apo Monikën e që sot as që ia përmendin më emrin LSI-së.

E kanë kuptuar deputetët e LSI-së që nuk bëjnë më zë e kanë shkuar në drejtim të paditur. E ka kuptuar ish ?ish-ish Edmond Xhaxhinasto, them shumë ish-e se ka qenë disa herë ministër i ministrive më të rëndësishme të vendit dhe madje edhe Zv/Kryeministër, me një diplomë anglishteje, por Made in LSI. Kjo parti bënte bufin drejtor, ose njërin me shkollë fillore e me diploma falco, e bënte Ministër Mjedisi. Kështu pra, e ka kuptuar edhe Haxhinasto, që rruga e kombit duhet të taksohet dhe Rama ka të drejtë, duke kundërshtuar kështu ish partinë e tij.

Nëse kanë mbetur ndopak të zgjuar tek LSI-ja të ikin sa më parë, se në zgjedhjet vendore të vitit 2019, LSI-ja do shuhet plotësisht. Sepse është tashmë e provuar, si me të dhëna ashtu edhe në praktikë që shqiptarët, dhe jo vetëm në fakt, nuk e hedhin votën as për programin, as për spektrin politik, por për liderin e partisë. Ose thënë më qartë, për atë që ata konsiderojnë si Kryeministër të ardhshëm. Partitë tona nuk kanë program. Asnjëra prej tyre, as PS, as PD e as LSI. PS tha do ulë taksat ndërkohë po shtohet çdo muaj një e tillë, dhe ecën me plane gjashtëmujore ose një vjeçare.

Edhe spektër politik nuk ka. PS-ja nuk është më aspak parti e majtë, pasi qeverisjen e saj e ka të mbështetur tek koncesionet dhe privatizimin. PS sot është një parti mutande, pa identitet e ideologji, ajo thjeshtë ka Edi Ramën, e bën çfarë ti dojë qejfi Edi Ramës. Pasi ai është e do mbetet opsioni i kësaj partie si Kryeministër i ardhshëm sa herë që ka patur e do ketë zgjedhje nën drejtimin e tij.

As PD-ja nuk është e djathtë pasi nuk po promovon as edhe një koncept të së djathtës. Ndërsa LSI-ja e quan veten të qendrës jo për ideologji por vetëm si pozicion strategjik, që të kalojë majtas apo djathtas sapo të kërkojë interesi.

Kështu pra, na mbetet që shqiptarët do votojnë pa program, pa ideologji politike, por vetëm liderët të cilët janë: Rama, Basha, dhe Mona.

Asnjëri nga këta nuk e meriton të jetë kryeministër i shqiptarëve por ja që këta na kanë rënë për pjesë, pasi kur të zgjuarit dhe të ndershmit nuk merren me politikë, mbeten ata më pak të zgjuar e më pak të ndershëm, ndaj edhe liderët i kanë fodullë e të korruptuar. Dhe ja nga këta të tre, dy herë zgjedhjet i fitoi Rama, asnjë sukses nuk ka korrur Basha, dhe asnjë testim nuk ka kaluar Mona, e cila vetëm brenda gjashtë muajve ka krijuar një antipasti të paparë në politikën shqiptare.

Dhe Monën, asnjë shqiptar nuk e sheh si Kryeministre të mundshme. Dhe kam besimin se vetë Mona nuk e sheh veten si Kryeministre. Dhe në momentin që nuk pasqyron apo aspiron për një pozicion të tillë askush nuk do të të ndjekë pas. Ndaj edhe ?Adios LSI.? Vitin që vjen kjo parti do të abandonohet në atë farë pike që, ashtu siç u bënë skeçe për suksesin e saj, do bëhen edhe skeçe, madje edhe më gazmore, për rrëzimin e saj fatal.

Adios LSI ? ora mbrapsht ka filluar. Madje edhe vetë Mona mund të largohet. Por se tek kush do të shkojë? Rama apo Basha? Do e vendosë vitin që vjen.