E fundit!

08:28 Kronika

"Mos kalo nga kjo rrugë"/ Si nisi konflikti mes dy vëllezërve në Kavajë që përfundoi në vrasje

Një person është vrarë mbrëmjen e djeshme nga vëllai i tij...

Nga Mero BAZE/Në dorë të Merkelit, apo të Metës?

16 Prill 2017, 07:16, Aktualitet CNA

Në Shqipëri kemi një krizë themelore dhe dy nënshtresa të saj. Kriza kryesore është kriza politike e bojkotit të zgjedhjeve dhe Kuvendit nga opozita. Dy nënshtresat e saj, janë kriza e Partisë Demokratike të Shqipërisë me Partitë Popullore Europiane, që po shtohet si një krizë e re në krizën politike shqiptare, dhe kriza e besimit që po lind mes LSI dhe PD, edhe pse LSI ishte deri më sot si ?garante? e aksionit të saj politik.

Partitë Popullore Europiane dhe partia e kancelares Angela Merkel, po hezitojnë të përfshihen si negociatore në krizën shqiptare, nëse Lulzim Basha dhe Sali Berisha, nuk garantojnë sukses në opsionin e tyre, për hyrje në zgjedhje dhe votim të reformës në drejtësi, duke u kthyer në parlament. Përpjekjet e Lulzim Bashës në takimin e Maltës kanë qenë tejet të dështuara dhe kanë shkaktuar një pakënqësi të thellë tek drejtuesit e Partive Popullore dhe kancelares Merkel, për shkak të mosdëgjueshmërisë së tij ndaj kërkesave të tyre.

Aq keq kanë shkuar, sa ai nuk ka guxuar si zakonisht të botojë dhe foton me kancelaren Merkel, siç bën zakonisht. Burime diplomatike bëjnë të ditur se partia e kancelares Merkel, e cila është lokomotiva e Partive Popullore Europiane, dhe që ka një vëmendje të veçantë për Shqipërinë, ka përgatitur në parim një negociator të nivelit të lartë për krizën shqiptare, por ai nuk do të presë biletën për në Tiranë, nëse nuk merr garanci se misioni i tij do të ketë sukses.

Kryetari i PD, Lulzim Basha, po bëhet përditë e më i parëndësishëm për Partitë Popullore me refuzimin e tij për të ndjekur vijën e tyre, dhe nëse i qëndron kursit aktual, ai do ta çojë Partinë Demokratike drejt përjashtimit nga Partitë Popullore, duke shënuar një rekord të zi historik në krye të saj. Këtu ka nisur dhe nënshtresa tjetër e kësaj krize.

Duke njohur krizën e PD me Partitë Popllore Europiane, Ilir Meta ka adresuar sot pikërisht Partitë Popullore si shpresa e fundit për zgjidhjen e krizës, duke shpresuar se ata do të bindin Lulzim Bashën të kthehet në Kuvend. Kjo është një përpjekje e tij për t?i ikur rolit që mori përsipër si garant i opozitës, duke theksuar se nëse opozita nuk hyn në zgjedhje, nuk do të ketë zgjedhje.

Lëvizja e tij nga garant i opozitës, në aleat me aleatët europianë të PD, është një lëvizje që ngjall realisht irritim tek PD, pasi ata kanë hyrë në këtë betejë antiperëndimore dhe me garancitë e LSI. Tani që ata kanë ikur shumë tutje, në një rrugë gati pa kthim, LSI u ka dalë përpara veshur me stofin e PPE, dhe u tregon rrugën perëndimore.

Por në fakt, që të zgjidhet kriza kryesore në vend, që ka të bëjë me ikjen e opozitës nga sistemi politik që kemi rënë dakord në vitin 1990, duhet të zgjidhen të dyja këto kriza si nënshtresa të saj. Kriza e LSI me PD, është krizë mosbesimi, e cila mund të zgjidhet vetëm nëse LSI garanton PD, se do të shkojë me ta në zgjedhje në një koalicion për të mundur Edi Ramën.

Vetëm kështu opozita mund të qetësohet dhe trimërohet, zgjedhjet bëhen të shëndetshme dhe nuk ka nevojë për garanci perëndimore. Kriza tjetër, ajo e PD me Partitë Popullore Europiane, buron nga kriza e mosbesimit të PD me LSI. PD nuk hyn në zgjdhje nëse LSI hyn për shkak të presionit perëndimor.

Garancia e LSI për PD, vlen që të prishen zgjedhjet dhe jo që të dëgjohet Perëndimi. Diplomati i lartë perëndimor që është ngarkuar për krizën shqiptare dhe që drejton një nga Komisionet më të rëndësishme të politikës së Brukselit në emër të partisë së kancelares Merkel, do të vijë në Tiranë vetëm nëse Basha e garanton se do hyjë në zgjedhje dhe në Kuvend, dhe që ta bëjë këtë, atij i duhet Ilir Meta. E vërteta është se Lulzim Basha nuk ka nevojë që Ilir Meta apo Edi Rama t?i tregojnë që ai nuk ka mbështetje ndërkombëtare në këtë që bën.

Ai është i qartë që nuk ka mbështetje dhe është duke i hyrë një rruge antieuropiane. Problemi i tij është se ka menduar që në këtë rrugë nuk do ishte vetëm. Këtë duhet ta zgjidhë, pasi të gjithë mendojnë se ai dhe vendimet që do marrë, janë në dorë të Merkelit apo McAllister, por në fakt janë në dorë të Metës! /TemA