Megaskandali/ Qeveria i jep kërkimet e naftës një kompanie “offshore”

25 Qershor 2016, 08:44, Aktualitet CNA

Kompania kanadeze “Zenith Energy Ltd” që ka fituar koncesionin e kërkimit të naftës në bllokun tokësor C në Shqipëri, rezulton të jetë e regjistuar në Ishujt Virgin Britanik.

Por me çfarë ka të bëjë koncesioni i fituar nga kanadezët në Shqipëri?

“Zenith Energy” ka bërë me dije se është njoftuar nga Agjencia Kombëtare e Burimeve Natyrore të Shqipërisë për shpalljen fituese të tenderit të kryer për Bllokun C në vend. Njoftimi zyrtar nga kompania Zenith Energy është bërë në 12 Maj 2016, ndërsa hapja e thirrjeve për tenderin është urdhëruar nga Ministri i Energjisë Damian Gjinkuri në 15 maj të 2015.

Mendohet se në Bllokun C gjenden rezervave të konsiderueshme gazi, përfshirë fushën Divjakë Ballaj ku supozohet se gjenden deri në 2.2 miliardë metër kub gaz. Eksplorimet e mëparshme të kryera në këtë bllok kanë bërë të mendohet se në Bllokun C mund të gjendet edhe naftë.

Blloku C shtrihet në pjesën veriore të Ultësirës pranë Adriatike, në jug të qytetit të Durrësit përgjatë rajonit qendror bregdetar të vendit dhe përfshin një territor prej 900 kilometrash katrorë.

Kompania do të ketë shtatë vjet afat për të kryer aktivitetet fillestare të kërkimit, që lejon shtyrjen e angazhimeve të mëdha financiare.

Çfarë janë Ishujt Virgin Britanik?

Ishujt Virgin Britanik shërbejnë si një Qendër Financiare Offshore, të specializuar në ofrimin e shërbimeve për firma të huaja dhe për investimin e fondeve të huaja. Sekreti bankar është i madh ndërsa taksat për transaksionet financiare janë të vogla ose zero. Të ngjashëm me ishujt virgin janë edhe Makao, Bahamas dhe Panamaja. Shërbimet financiare janë plotësisht ligjore, është thjesht ruajtja e sekretit që i bën shumë tërheqës kompanitë që kryejnë evazion fiskal apo ?hajdutët? nga e gjithë bota.

Referuar dokumentit ekskluziv të siguruar nga citynews, rezulton se vetë kompania e ka pranuar regjistrimin e saj në ishujt Virgin britanik.

?Më 27 nëntor 2015, kompania inkorporoi një degë tërësisht në pronësi në Ishujt Virgin Britanik (“BVI”) sipas Aktit të kompanive të Biznesit BVI, 2004 dhe ndryshoi emrin e filialit në Zenith Aran Oil Company Limited më 30 dhjetor 2015 .? thuhet në dokumentin e kompanisë.

Në ditët në vijim, citynews do publikojë të tjera fakte që lidhen me kompaninë në fjalë, e cila sipas dokumentave që citynews disponon, Zenith Energy ka qenë në prag falimentimi në kohën kur ka fituar tenderin për kërkimin e naftës në Shqipëri./citynews