Juristët në mbështetje të Blushit/ Zgjedhja e Presidentit nga populli do shmangë pazaret politike, ja rruga që duhet të ndiqet

25 Qershor 2016, 08:21, Aktualitet CNA

Zgjedhja e Presidentit të Republikës nga populli është një propozim i hedhur në diskutim prej vitesh, por, duket qartë se liderët e politikës shqiptare për hir të interesave të tyre nuk janë dashamirës të ndryshimit të sistemit nga parlamentar, në presidencial. Ky propozim është hedhur sërish në diskutim nga deputetët Ben Blushi dhe Mimoza Hafizi, të cilët kanë paralajmëruar një amendament për zgjedhjen e Presidentit nga populli.

Konstitucionalistët, të pyetur nga gazeta ?Sot?, mbështesin propozimin e Ben Blushit, duke theksuar se zgjedhja e Presidentit të Republikës nga populli do të shmangë pazaret politike dhe nuk do të lejojë politikën të fusë duart në sistemin e drejtësisë. Ish-kreu i Gjykatës së Lartë, Fehmi Abdiu, theksoi se ka ardhur koha që politikanët të qëndrojnë larg gjyqësorit, dhe mënyra më efikase do të ishte zgjedhja e Presidentit nga populli.

?Ndryshimi i Kushtetutës do sjellë mentalitet të ri në zgjedhjen e Presidentit duke kaluar në Republikë Presidenciale. Pra, Presidentin e zgjedh populli dhe jo politikanët me vota vjedhura dhe me makinacione. Ka ardhur koha që të bëhet balancimi i pushteteve në raport me Parlamentin dhe institucionet e tjera. Ka ardhur koha që politikanët ta mbyllin gojën pasi të bëhet reforma e të mos bëjnë asnjë lloj presioni mbi pushtetin gjyqësor?, theksoi Abdiu.

Juristi Sokol Hazizaj mbështet zgjedhjen e Presidentit nga populli, por që kërkon ndryshime thelbësore të Kushtetutës. Hazizaj thotë se rriten kompetencat e Presidentit në raport me institucionet që do të ketë në varësi.

?Riformatimi i zgjedhjes së Presidentit kërkon ndryshime tërësore në dispozitat kryesore kushtetuese, sepse nuk lidhet vetëm me mënyrën e zgjedhjes së Presidentit, por lidhet edhe me zgjerimin e tagrave, detyrimeve të Presidentit në raport me institucionet që ai do ketë në varësi, por dhe me organizimin dhe funksionimin e institucionit të Presidentit të Republikës. Nga sistemi parlamentar, kalojmë në sistem presidencial. Jo vetëm kaq por kjo kërkon ndryshime edhe të vetë Kuvendit, të dhomave dhe mënyrës së funksionimit të tij. Kërkon edhe ndryshime të përgjegjësisë së vetë Presidentit. Pra, kërkon një diskutim të gjerë?, tha Hazizaj.

Ndërkaq, ai kritikon Kuvendin se ka treguar papërgjegjshmëri ndaj institucionit të Presidentit. ?Përpara kësaj ideje, Kuvendi jonë është treguar i papërgjegjshëm dhe jo funksional me ligjin e organizimit dhe funksionimit të Presidentit. Përfytyroni një Kuvend, i cili hyn në ofensiva të ndryshimit të sistemit kur nuk ka mundur për kaq vite nga ?98 të organizojë dhe të bëjë të funksionojë institucioni i Presidentit?, tha Hazizaj.

Juristi Hazizaj flet edhe për reduktimin e numrit të deputetëve në Kuvend. ?Reduktimi i numrit të deputetëve vjen në raport me uljen e numrit të popullsisë. Është një situatë gjeodemografike dhe mendoj se do të ishte e domosdoshme një sistem zgjedhor që do të mbarte brenda vetes ashtu si edhe Kushtetuta, reduktimin e numrit të Kuvendit?, tha Hazizaj.