"Përgjimet"/ Pajisja u përdor për gjurmimin e trafikantëve të dorgës

25 Qershor 2016, 06:42, Aktualitet CNA

Fakte të reja dalin në skenë në lidhje me skandalin e përgjimeve në vend, i cili shkaktoi një bujë të madhe në opinionin publik. Dyshohet se pajisja e përgjimit është përdorur për gjurmimin e trafikantëve të drogës në qytetin e Vlorës, ku dihet që trafiku i drogës drejt Italisë është i niveleve shumë të larta. Gjithashtu, pajisja është përdorur edhe në burgun e Peqinit, i cili konsiderohet si burg i sigurisë më të lartë në vend dhe ku ndodhen personat më të rrezikshëm, në burgun 302 në Tiranë edhe në burgun e Fushë-Krujës. Për të zbardhur këtë skandal janë marrë në dorëzim librat e hyrje-daljeve në këto burgje, nga ku pritet të dalin të dhëna konkrete në lidhje me pajisjen ?IMSI Catcher?, shkruan “SOT”

Në fakt trafiku i drogës në qytetin e Vlorës vazhdimisht ka qenë burim për trafikun e drogës. Autoritetet italiane vazhdimisht kanë ngritur shqetësimet e tyre se Shqipëria është vendburim për trafikun e drogës, madje më parë në Vlorë janë kapur edhe disa avionë, të cilët dyshohen se kanë transportuar drogë. Mendohet se këto fakte kanë bërë që pajisja e përgjimit të përdoret nga policia në qytetin e Vlorës, pikërisht për të luftuar trafikun e drogës. Kjo është një pistë e re hetimi nga Prokuroria e Përgjithshme, që paralelisht është duke hetuar edhe në disa variante të tjera. Tashmë perimetri i hetimeve duket se është zgjeruar, pasi hetuesit, me urdhër të prokurorëve, kanë sekuestruar librat e hyrje-daljeve në disa paraburgime dhe burgje në Shqipëri.

Ky veprim ka ardhur pasi është evidentuar se agjentët e Forcave të Posaçme të Operacionaleve nën drejtimin e të proceduarit penalisht, Entiol Xhelilaj, kanë përdorur pajisjen ?IMSI Catcher? edhe në burgje, fakt që e pranoi në dëshminë e tij edhe drejtori i policisë së shtetit, Haki Çako. Konkretisht, mësohet se janë sekuestruar librat e hyrje-daljeve në burgun e Peqinit, të paraburgimit ?Mine Peza?, ose siç njihet ndryshe si 302-shi, si dhe burgun e Fushë-Krujës. Burgu i Peqinit konsiderohet i sigurisë së lartë në vend dhe aty ndodhen personat më të rrezikshëm, ndërsa tek burgu 302 mendohet se janë përgjuar edhe zyrtarë të lartë deri në nivel politikanësh.