E fundit!

20:40 Kosova & Bota

Dorëheqje dhe zgjedhje të parakohshme/ Çfarë deklaroi Vuçiç në tubimin e partisë së tij në Beograd

Presidenti i Serbisë, Alesandar Vuçiç ka njoftuar ditën e ...

Reforma në drejtësi bllokon verifikimin e pasurisë së gjyqtarëve dhe prokurorëve/ ILDKP bën gati dosjet

16 Qershor 2016, 06:26, Aktualitet CNA

Sapo të miratohet reforma në drejtësi, të gjithë prokurorët dhe gjyqtarët në vend do kalojnë në sitë nga Inspektorati i Lartë i Deklarimit dhe Kontrollit të Pasurive. Sipas burimeve nga ky institucion, aktualisht janë bërë gati dosjet me pasuritë e të gjithë gjyqtarëve e prokurorëve që nga viti i parë i deklarimit, mirëpo për shkak të reformës në drejtësi nuk ka nisur ende puna për të kryer verifikimin, shkruan “Sot”

Në kuadër të reformës do të ndryshojë ligji për ILDKP dhe do të ketë procedura të reja e për këtë arsye, mungesa e konsensusit mes mazhorancës dhe opozitës ka bllokuar punën dhe nuk lejon që të verifikohen të gjithë ata gjyqtarë dhe prokurorë të dyshimtë që nga fillimi. Nga ana tjetër mësohet se për vitin 2015 kanë nisur verifikimet për gjyqtarët, prokurorët, deputetët dhe kryebashkiakët. Inspektorët po kontrollojë me detaje deklaratat e pasurisë së tyre dhe në momentin që do të evidentohen shkelje, atëherë do të ketë dhe kallëzime penale. Janë rreth 80 gjyqtarë e prokurorë që do të kontrollohen sa i përket pasurisë pasi dyshohet se pjesa dërrmuese e tyre e ka vendosur pasurinë përmes korrupsionit dhe aferave të tjera. Ditët e fundit ka pasur akuza shumë të forta në drejtim të gjykatave si nga kryeministri ashtu dhe nga ministri i Brendshëm. Por edhe më herët ambasadorët kanë dhënë alarmin se gjyqësori shqiptar është ndër më të korruptuarit në rajon dhe Evropë.

Madje, amerikanët kanë thënë se është pikërisht ky gjyqësor që ndalon ardhjen e investitorëve të huaj, pasi kanë frikë që të përballen nëpër gjyqe. Nga kontrolli i pasurisë së tyre pritet të zbulohen dhe aferat. Por bllokimi i reformës në drejtësi nga palët ka bërë që dhe kontrolli i pasurisë së tyre të ngecë në mes. ILDKP është në pritje të vendimit të palëve dhe sapo të hyjnë në fuqi ligjet e reja atëherë të gjithë do kalojnë në sitë.