Deficiti buxhetor për 3 mujorin e parë 115 % më i lartë se në 2014, qeveria ul investimet, paratë në BSH

17 Maj 2015, 08:32, Ekonomi CNA

Deficiti buxhetor në tremujorin e parë të vitit arriti në 3.9 miliardë lekë, duke qenë rreth 115.1% më i lartë se në të njëjtën periudhë të një viti më parë. Konstatimi vjen nga Banka e Shqipërisë, sipas së cilës ky zhvillim mbart jo vetëm efektin e bazës së ulët krahasuese, por edhe natyrën mjaft të luhatshme të këtij treguesi në muajt e parë të vitit. Në raportin e saj të politikës monetare për 3 mujorin e parë të 2015, Banka e Shqipërisë konstaton se financimi i këtij deficiti është arritur nëpërmjet burimeve të jashtme, kryesisht nga huaja e disbursuar nga FMN. Por BSH vëren po ashtu se krahas burimeve të huaja, është rritur edhe kërkesa e qeverisë për financim në tregun e brendshëm. Nga ana tjetër, Ministria e Financave posedon të tjera shifra përsa i përket këtij 3 mujori. Në raportin e saj për statistikat fiskale mujore, Ministria e Financave raporton zyrtarisht se gjatë 3 mujorit të parë janar-mars 2015, deficiti buxhetor arriti 4.1 miliard lekë, ndërkohë që ishte parashikuar të kapte shifrën 11.8 miliardë lekë. sipas të dhënave zyrtare nga ky dikaster, të ardhurat gjatë periudhës janar-mars 2015 kapën shifrën 87 miliardë lekë, ndërkohë që ishin parashikuar të arrinin deri në 89.2 miliardë, pra rreth 2.2 miliardë më pak. Rënia e të ardhurave në këtë 3 mujor është parë me shqetësim dhe nga Fondi Monetar Ndërkombëtar, sipas të cilit, shkaqet që ndikuan në këtë rezultat ishin; çmimi i ulët i naftës, importi më i ulët i cigareve dhe inflacioni relativisht i ulët.

Qeveria ul investimet, paratë në BSH

Sipas të dhënave zyrtare të Ministrisë së Financave, shpenzimet ishin po ashtu gjatë kësaj periudhe më të ulëta se parashikimi i qeverisë. Kjo e fundit kishte parashikuar 101 miliard lekë shpenzime për periudhën janar-mars 2015, por sipas të dhënave nga Financat, në këtë periudhë 3 mujore u shpenzuan vetëm 91 miliardë lekë, ose 10 miliardë lekë më pak nga sa ishte parashikuar. Shpenzimet kapitale rezultojë për këtë 3 mujor me 3 miliardë lekë më pak se parashikimi i qeverisë për këtë periudhë. Qeveria kishte parashikuar 10.1 miliardë lekë shpenzime kapitale për këtë 3 mujor, ndërkohë që kjo shifër sipas të dhënave nga Financat, rezulton të ketë arritur vetëm 8.8 miliardë lekë. Banka e Shqipërisë vlerëson në raportin e saj për politikën 3 mujore të këtij viti se pavarësisht shtimit të huamarrjes nga burimet e jashtme ashtu dhe nga ato të brendshme, nga ana tjetër, gjendja e llogarive të qeverisë pranë Bankës së Shqipërisë është rritur, duke ilustruar faktin se huamarrja bruto e qeverisë ka qenë më e lartë se nevojat e saj për financimin e deficitit. Ministria e Financave kishte parashikuar po ashtu një deficit prej 11.8 miliardë lekë për këtë 3 mujor të parë të 2015. Por sipas të dhënave zyrtare nga vetë ky institucion, deficiti për këtë 3 mujor ishte vetëm 4.1 miliardë lekë. /sot.com.al