Lokalet 2015/ Kandidatët dhe beteja për Bashkinë e Korcës

27 Janar 2015, 10:27, Aktualitet CNA

Gara e zgjedhjeve vendore për Bashkinë e Korcës pritet të ketë dy kandidatura kryesore, por ku nuk do të mungojnë edhe kandidatë të mundshëm surprizë. Partia Socialiste pritet të kandidojë Sotiraq Filon, kryetarin aktual të Bashkisë, ndërkohë që PD do vendosë përballë tij Andrea Manon, kryetari aktual i PD në Korcë. Dëshirat për të kandiduar nuk mungojnë edhe nga LSI e cila ka në tryezë kandidaturën e Stefan Gërmenjit, aktualisht nënkryetar i Bashkisë së Korcës. Por kandidatura e tij i ka pothuaj zero shanset pasi LSI lufton për të marrë bashkinë e Maliqit ose të Pogradecit. Një kandidaturë tjetër e cila vjen nga e djathta është Brikena Zeneli, përfaqësuese e FRD së Bamir Topit e cila nuk mundi të kandidonte në zgjedhjet e nëntorit 2014 pas intrigave të bëra nga strukturat e PD në Korcë, pasi e shikojnë atë si një rivale që mund të përcajë votat e së djathtës, duke e bërë më te lëhtë garën për rivalin socialist Sotiraq Filo.

Sotiraq Filo aktualisht kryetar i Bashkisë Korcë që nga nëntori 2013, erdhi në këtë post pas dorëheqjes së Niko Peleshit, që mori postin e zëvendës kryeministrit.

Në dy vite edhe me mbështetjen e Peleshit, në Bashkinë Korcë kanë vijuar investime që mund të quhen edhe madhore por dhe të debatueshme. Shuma e investimeve prej 4.5 milion dollarë përfshiu rigjenerimin e plotë të Parkut Rinia, sheshin përpara ish hotel turizmit, ku është ngritur edhe një kullë panoramike që u u debatua dhe kundërshtua nga shumë zëra qytetarë. Një nga investimet ku Bashkia Korcë dhe drejtuesi i saj Filo kanë avantazh është edhe rikonstruksioni i Pazarit të Vjetër të Korcës. Tashmë të gjithë këto investime janë në përfundim dhe janë një armë e fortë për Filon. Por jo pak kosto mund të ketë kandidatura Filos nga debatet për kullën në qendër.

Në zgjedhjet e fundit Filo kishte një diferencë mbi 10 mijë vota mbi kandidatin e opozitës. Ai shikohet si kandidat i avantazhuar jo vetëm për investimet por edhe për shkak të mbështetjes nga zv. kryeministri Niko Peleshi i cili në krahun e djathtë të Edi Ramës kërkon të vijojë investimet në këtë Bashki duke i kaluar nëpërmjet mëkëmbësit të tij Filo.

Përballë Filos në garën për kryebashkiak pritet të jetë Andrea Mano, kryetari aktual i PD Korcë, i cili do të ishte një rast i rrallë që edhe pse ka kandiduar dhe ka humbur bashkinë përballë Niko Peleshit më 2011, kërkon përsëri të jetë pjesë e garës për drejtimin e një bashkie tashmë të zgjeruar me komunat Bulgarec, Drenovë, Voskop, Voskopojë, Lekas dhe Vithkuq. Mano gjatë qeverisjes së PD në vitet 2005 – 2009 ishte drejtor i arsimit të rrethit Korcë ku dhe u përfol dhe akuzua për emërime korruptive e klienteliste. Në atë kohë ai ishte përfaqesues i PDR së Genc Pollos. Në vitin 2009, Mano kandidon dhe humbet për postin e kreut të PD përballë Gjergji Papës, duke mos mundur të marrë më shumë se 30 për qind të votave të strukturave të PD. Në vitin 2011 ai kandidon në garën për Bashkinë e Korcës, pasi prej dy vjetësh ishte prefekt i këtij qarku por që nuk mundi të thyente Niko Peleshin që e mundi atë me mbi 2000 vota. Mano edhe pse humbës nuk dha dorëheqjen nga prefekt i Korcës deri në fund të qeverisjes së PD. Në vitin 2014 Andrea Mano zgjidhet kryetar i PD Korcë. Në mbledhjen e fundit të zhvilluar nga dega e PD Korcë, Mano është propozuar si kandidat duke marrë mbashtetjen e shumicës së kryesisë së degës dhe shikohet si i vetmi person që mund të thyejë ?furinë? e majtë në Korcë. Gjithsesi gjithcka i mbetet garës së qershorit

Në garë për Këshillin Bashkiak të Korcës për herë të parë do të ketë edhe përfaqësues nga komunat të cilët pritet të jenë në listat fituese por edhe në pika kyce për të bërë diferencën e votave. Në këtë garë do të përfshihen edhe aletatët e vegjël të PS dhe PD të cilat po përzgjedhin emra sa më përfaqësues me synim marrjen e vendeve në Këshill dhe maksimizimine votive në zgjedhjet vendore të qershorit.

Elvi FUNDO