E fundit!

18:08 Aktualitet

Emri-Zgjidhet kryetari i Komisionit të Prokurimit Publik

Kuvendi ka zgjedhur kryetarin e Komisionit të Prokurimit P...

Vendim i papritur nga Yamal, nuk ka më autografe për tifozët

18 Tetor 2025, 14:27, Sport CNA

Lamine Yamal, një nga talentet më të spikatur të Barcelona-s dhe të futbollit europian, po ndryshon qasjen në menaxhimin e imazhit personal dhe të vlerës tregtare të sportistëve.

Sipas së përditshmes sportive “Mundo Deportivo”, 18-vjeçari ka marrë një ofertë nga një kompani ndërkombëtare e specializuar në shitjen e produkteve sportive me autografe, që përfshijnë fanella, këpucë dhe artikuj të tjerë të lidhur me botën e futbollit.

Ky bashkëpunim parashikon që firma e lojtarit të mos jetë më lehtësisht e aksesueshme për publikun, por të përdoret në mënyrë të kontrolluar dhe komerciale.

Për këtë arsye, është vendosur që Yamal të mos japë më autografe për tifozët. Vendimi për të reduktuar autografet spontane është marrë me këshillën e stafit të menaxhimit të Yamal-it. Qëllimi është ruajtja e vlerës dhe autenticitetit të firmës, e cila tashmë po konsiderohet si një element i rëndësishëm i markës personale të futbollistit.

Kjo do të thotë se Yamal nuk do të ndalojë plotësisht ndërveprimin me tifozët, por do të kufizojë nënshkrimet e rastësishme, duke mbetur i hapur për foto apo takime të organizuara në kuadër të aktiviteteve zyrtare të klubit.

Ndërkohë, agjencia që përfaqëson interesat e tij po negocion me një kompani të specializuar në prodhimin dhe tregtimin e produkteve me autografë.

Projekti parashikon krijimin e një portali online ku tifozët do të mund të blejnë produkte origjinale me firmën e Yamal, të certifikuara dhe me numër të kufizuar. Një qasje e tillë është e përhapur në tregun amerikan të sportit, veçanërisht në NBA, ku autografet trajtohen si pasuri tregtare me vlerë të lartë dhe me qarkullim të kontrolluar.

Barcelona, nga ana e saj, e ka mbështetur këtë vendim duke e konsideruar një hap në përputhje me strategjinë moderne të marketingut të klubit. Një numër i kufizuar autografesh do të ruhet për evente zyrtare, marrëveshje sponsorizimi dhe detyrime institucionale. Në këtë mënyrë, klubi dhe lojtari synojnë të ruajnë ekuilibrin mes marrëdhënies me publikun dhe interesave komerciale.