Sot përcaktohet finalistja e parë/ Spanja dhe Franca premtojnë spektakël

9 Korrik 2024, 12:37, Sport CNA

Sot përcaktohet finalistja e parë/ Spanja dhe Franca premtojnë

Spanja dhe Franca përballen mes tyre, në gjysmëfinalen e Europianit. Përballë njëra-tjetrës vendosen dy nga pretendentet kryesore për të fituar trofeun.

Në këtë takim, është e vështirë për të zgjedhur një favorit, por spektakli është i garantuar.

Gjatë kësaj periudhe, Spanja ka treguar një sulm efikas, por mbrojtja e tyre e fortë meriton pjesën më të madhe të lavdërimeve. “La Roja” kanë pësuar vetëm një gol nga kundërshtarët në këtë kampionat dhe nuk kanë pësuar më shumë se një gol në asnjërën nga këto shtatë fitore.

Me këtë rekord mbrojtës, Spanja futet me plot vetëbesim në përballjen gjysmëfinale kundër Francës.

Ky vetëbesim mund të rritet edhe më shumë duke marrë parasysh formën e zbehtë të Francës në sulm gjatë turneut. Ata kaluan Portugalinë në një ndeshje të tensionuar pa gola, ku Theo Hernandez shënoi penalltinë fituese në gjuajtjen nga pika e bardhë pasi Feliks gaboi për portugezët.

Franca ka arritur deri në gjysmëfinale pa shënuar asnjë gol nga loja e hapur. Një penallti e shënuar dhe dy autogola është bilanci i “Gjelave” në fazën ofensive.

Trajneri Didier Deschamps pranoi se skuadra e tij duhet të përmirësohet në sulm pas fitores, megjithatë reputacioni i tij si një fitues vazhdon të rritet.

Ai u emërua trajner në vitin 2012 dhe mund të arrijë në finalen e katërt të madhe nga gjashtë të mundshme nëse skuadra e tij fiton përsëri, duke mbajtur gjallë synimin e tij për t’u bërë i dyti pas gjermanit Berti Vogc që fiton një Kampionat Evropian si lojtar dhe si trajner.

Kjo do të jetë hera e gjashtë që Spanja dhe Franca përballen në finalet e një kompeticioni madhor. Franca ka fituar 3 nga 4 ndeshjet e para të luajtura, ndërsa Spanja ka fituar për herë të fundit në një kompeticion madhor ndaj “gjelave” në "Euro 2012" kur dhe mori trofeun. Ndërkohë që një ndeshje ka përfunduar në barazim.