web counter
LEXO PA REKLAMA!

SHKARKO APP

App Store
Google Play

Silvinjo, drejt largimit nga Shqipëria? Ja situata e trajnerit brazilian

28 Qershor 2024, 11:04, Sport CNA

Silvinjo, drejt largimit nga Shqipëria? Ja situata e trajnerit brazilian

E ardhmja e trajnerit Silvinjo në stolin e Shqipërisë është në dyshim. Teknikut brazilian i ka përfunduar kontrata me Kombëtaren shqiptare pas Europianit dhe gjithçka është e pasigurt.

Presidenti i Federatës Shqiptare të Futbollit, Armand Duka, ka thënë se trajnerit i është ofruar rinovimi që në muajin janar, por ende mungon firma.

Silvinjo duket se nuk e ka vendosur ende se ku do të vazhdojë, kjo edhe për shkak të ofertave në drejtim të tij. Kjo i trazon disi ujërat në Kombëtaren shqiptare pasi ndeshjet e radhës vijnë shpejt. Në shtator do të nisë edicioni i ri i Ligës së Kombeve dhe braziliani ka krijuar një raport të ngushtë me shumicën e grupit, pavarësisht se dikush mund të ketë pakënaqësi për minutazhin apo çështje të tjera.

Në fund të fundit Silvinjo vendos dhe ai do të gjykohet për vendimet e tij. Mes dëshirës për t'u rikthyer në një klub dhe mes “zjarrit” të kualifikueseve të Botërorit 2026 me kuqezinjtë, Silvinjo është në një udhëkryq me dosjen e trajnerit në dorë.

Sipas raportimeve nga Spanja, në gjurmët e trajnerit të Shqipërisë, janë vënë disa klube, që duan ta kenë në stol për sezonin e ri.

Pas eliminimit nga Europiani, Silvinjo ka marrë pushimet dhe brenda muajit të ardhshëm, do të vendosë përfundimisht për të ardhmen.

Nuk përjashtohet mundësia që braziliani të largohet, por gjasat më të mëdha, janë që ai të zgjasë bashkëpunimin me FSHF-në.

Ditë të nxehta, por një zgjidhje duhet të vijë sa më shpejt pasi grumbullimi i radhës është vetëm dy muaj më vonë.

Silvinjo u emërua në stolin e Shqipërisë, në janar të vitit 2023 dhe nga ajo kohë, ka drejtuar kuqezinjtë në 16 ndeshje, zyrtare dhe miqësore, ku ka arritur 7 fitore, 5 humbje dhe 4 barazime.





Lajmet e fundit nga