E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Neymar "fal" 30 milionë euro tek Al Hilal

29 Janar 2025, 18:06, Sport CNA

Neymar ka vendosur të mbyllë aventurën në Arabinë Saudite tek Al Hilal, për tu rikthyer te Santos, klubi ku ai nisi karrierën dhe ku u bë një nga talentet më premtuese të futbollit botëror.

Për të mbyllur kontratën e tij me Al Hilal, Neymar ka hequr dorë nga një shumë e konsiderueshme, duke i “kursyer” klubit saudit rreth 30 milionë dollarë nga marrëveshja që ishte parashikuar të zgjaste deri në fundin e sezonit. Megjithatë, ai nuk ka arsye për t’u ankuar, pasi ka përfituar një pasuri marramendëse nga kontrata e tij me klubin saudit, edhe pse kontributi i tij në fushë ka qenë minimal për shkak të dëmtimeve të njëpasnjëshme.

Kur Neymar u transferua te Al Hilal në verën e vitit 2023, lëvizja u konsiderua një nga më të mëdhatë në historinë e futbollit aziatik. Sheikët shpresonin se ai do të ishte një nga yjet kryesorë të projektit të tyre ambicioz për të ngritur nivelin e kampionatit saudit dhe për ta bërë atë më konkurrues në arenën ndërkombëtare.

Megjithatë, realiteti ishte ndryshe. Neymar u përball me probleme të vazhdueshme fizike që e penguan të kishte ndikimin e pritur. Statistikat e tij janë të zbehta, vetëm 7 ndeshje të luajtura me fanellën e Al Hilal, për një total prej 428 minutash në fushë. Gjatë kësaj periudhe, ai shënoi vetëm 1 gol dhe dha 3 asiste.

Në kontrast me pritshmëritë, kontributi i tij në fushë ishte minimal në raport me pagën e tij gjigante. Neymar kishte një rrogë prej 175 milionë dollarësh nga Al Hilal, një shifër që e bënte një nga futbollistët më të paguar në botë.

Për të ndërprerë kontratën e tij me Al Hilal, Neymar ka pranuar të heqë dorë nga një pjesë e pagës së tij të majme. Fillimisht, klubi saudit i detyrohej edhe 65 milionë dollarë nga marrëveshja e tij, por me marrëveshjen e arritur, ai do të përfitojë vetëm 35 milionë dollarë.

Nëse analizojmë aspektin financiar të kësaj aventure, shifrat janë të pabesueshme. Neymar ka përfituar mesatarisht 43.75 milionë dollarë për çdo gol ose asist që ka dhënë me fanellën e Al Hilal. Për më tepër, çdo minutë i tij në fushë i ka kushtuar klubit saudit 408 mijë dollarë, duke e bërë këtë një nga investimet më të diskutueshme në historinë e futbollit.

Me mbylljen e kapitullit saudit, Neymar është gati të rikthehet te Santosi, klubi që e rriti dhe e lançoi në skenën e madhe të futbollit botëror.

Ai dëshiron të gjejë ritmin e tij të lojës pas një periudhe të vështirë me dëmtime dhe të jetë gati për sfidat e ardhshme, përfshirë Kupën e Botës 2026, ku shpreson të jetë një lider për Kombëtaren e Brazilit.