E fundit!

20:21 Politikë

“Më telefonoi Berisha 1 orë para kandidimit”/ Korreshi tregon prapaskenat e zgjedhjeve në PD

Deputeti i Partisë Demokratike, Saimir Korreshi, ndau sot ...

Neymar largohet nga Al Hilal, zbulohet skuadra e re

28 Janar 2025, 20:58, Sport CNA

Neymar është larguar zyrtarisht nga Al Hilal dhe pritet të rikthehet në Brazil, te skuadra e Santos.

Pas aventurës zhgënjyese në Arabinë Saudite, sulmuesi tani përgatitet për një aventurë të re për karrierën e tij.

Largimi i Neymar nga Al-Hilal nuk ishte aspak surprizë për shkak të ecurisë së tij me klubin saudit. Me vetëm shtatë ndeshje të luajtura, një gol të shënuar dhe tre asiste, performanca e tij ishte shumë larg pritshmërive, për një klub që investoi shifra marramendëse për ta transferuar atë në Arabinë Saudite.

Në tetor 2023, një dëmtim i rëndë në gju gjatë një ndeshjeje me kombëtaren braziliane vulosi një sezon të dështuar për Nejmarin, duke e detyruar të qëndrojë jashtë fushës për një kohë të gjatë. Neymar i kushtoi arkave të Al Hilal plot 30 milionë euro për ndeshje.

Pas largimit nga Al-Hilal, Neymar po përgatitet të rikthehet te klubi ku gjithçka nisi. Santosi është gati ta mirëpresë përsëri Nejmarin. Sipas mediave braziliane, palët kanë arritur një marrëveshje për rikthimin e lojtarit, një lëvizje që nuk është vetëm profesionale, por edhe shumë personale për lojtarin.

Tifozët e Santos, të cilët kanë ëndërruar rikthimin e tij për vite të tëra, janë të entuziazmuar për këtë zhvillim. Zyrtarizimi i marrëveshjes pritet në ditët e ardhshme, ndërsa Nejmar mund të mbërrijë në Brazil që të mërkurën për të nisur një kapitull të ri në karrierën e tij.

Në moshën 32-vjeçare, Nejmar ndodhet në një moment kritik të karrierës së tij. Rikthimi te Santos nuk është thjesht një kthim në shtëpi, por një mundësi për të nisur nga e para dhe për të rifituar formën që dikur e bëri një nga lojtarët më të mirë në botë.

Neymar është një ikonë e Santosit dhe një simbol i futbollit brazilian. Mbetet të shihet nëse sulmuesi do të rigjejë formën e dikurshme, apo dëmtimet do të vazhdojnë ta ndjekin, siç ka ndodhur shpesh në tre vitet e fundit.