Kampionati i shahut në Pogradec/ Të rinjtë me interes të veçantë, 3 çmime të para

24 Korrik 2024, 19:55, Sport CNA

Kampionati i shahut në Pogradec

Loja e shahut është kthyer në një nga sportet që po merr zhvillim në qytetin e Pogradecit, ku krahas të gjitha sporteve të tjera, ky mbetet "sporti i mendjes" duke patur një rëndësi mjaft të madhe për të rinjtë. Për të disatin vit rrëdhazi në qytetin liqenor u zhvillua Kampionati Amator i Shahut, me pjesëmarrjen e 15 të rinjve dhe ajo çka u vu re, ishte edhe pjesëmarrja e fëmijëve të vegjël. Këto grupmosha ndonëse të ndryshme por për një qëllim të vetëm, janë përballur për të fituar kupën e këtij eventi.

Çmimin e parë arriti ta merrte Ermal Rakipllari i cili prej 3 vitesh i është përkushtuar plotësisht këtij sporti. Ndonëse sipas tij pasioni për shahun ka nisur vonë, sërish mbetet një nga sportet më të bukura. Aftësitë e tij në lojë sa vjen e përmirësohen, duke marrë parasysh edhe leksionet që ka marrë gjatë kësaj kohe, ndërsa thotë se ka marrë pjesë edhe në aktivitete të tjera në Pogradec e në kryeqytet.

"Kam rreth 2-3 vjet që i jam përkushtuar shahut definitivisht. Zanafilla ka filluar thjesht duke bërë lëvizjet, nuk dija të luaja shah. Më pas iu përkushtova pak më shumë, me disa leksione, mësime e skema dhe jam përmirësuar besoj. Ka vend akoma për përmirësim, gabime bëj shumë por loja e shahut është sport i mendjes. Më bëhet shumë qejfi që pashë fëmijë të vegjël, ishin lojtarë të fortë, sepse për ta është sport i dobishëm dhe i nevojshëm. Vjet mora pjesë kur u bë për herë të parë, gjithashtu edhe në Tiranë kam shkuar dy herë. Jam shumë i lumtur, fitoren ja dedikoj djalit tim të vogël Jonit."

Stefi Thëngjilli eshtë fituesi i vendit të dytë në këtë kampionat amator të lojës së shahut. Ai sapo ka mbaruar klasën e 9-të por është një nga ata shahistë të rinj që e ka nisur pasionin për lojën që në moshë të hershme. Ka qenë babai i tij ndihmesa e parë, e më pas aftësitë për lëvizjet e duhura i fitoi gjatë praktikës online. Për Stefin, neglizhenca e të rinjve ndaj shahut është shumë e madhe, e për këtë arsye ai u bën thirrje që të afrohen pranë këtij sporti pasi është një dritare në jetë.

"Kam mbaruar klasën e 9-të. Ky është viti i dytë që marr pjesë në turneun e shahut. Herën e parë u eleminova që në turin e parë por këtë rradhë arrita të shkoj deri në finale. Dua të falenderoj organizatorët e turneut dhe gjithë lojtarët që morën pjesë dhe shpresoj gjithnjë për më shumë në shah. Kam shfaqur dëshirë për ta mësuar lojën e shahut që në moshën 9 vjeçare. Si fillim më ka mësuar babi lëvizjen e figurave dhe më pas nëpërmjet internetit kam mësuar hapat e ndryshëm dhe jam praktikuar online. Për shahun nuk ka fare interes nga moshatarët. Mua nuk më duket sport i vështirë sepse kushdo në moshë të re mund ta mësojë, por më duket neglizhim. Ju bëj thirrje moshatarëve të mi që të fillojnë të mësojnë lojën e shahut sa janë në kohë sepse është një dritare në jetë e një sport shumë i rëndësishëm."

Kleo Ismaili është shahisti më i vogël që mori pjesë në këtë kampionat amator. 13 vjeçari ka arritur vendin e 4-rt në këtë herë të parë që merrte pjesë në një kampionat të tillë. Gjyshi i tij e ka mësuar të luajë shah që kur Kleo ishte vetëm 4 vjeç, ndërsa pasioni i madh për këtë sport, ka bërë që ai të mos shkëputet gjatë këtyre viteve prej tij. Shahisti më i ri i kampionatit ka treguar se po rritet pëlqyeshmëria ndaj lojës së shahut ndërsa ndihet optimist që kjo lojë po përhapet edhe nëpër shkolla.

"Është hera e parë që marr pjesë në Pogradec. Më ka mësuar gjyshi, që në moshën 4 vjeçare. Për shkak të disa gabimeve të vogla nuk vazhdova dot më tej por e rëndësishme është që mora pjesë. Në fakt ishte pak e vështirë sepse ata kanë më shumë eksperiencë, pavarësisht se e kam mësuar herët shahun jam ende i ri. Me kalimin e kohës mbase do të jem akoma më mirë e do luftoj më shumë. Gjithnjë e më shumë, më shumë veta po mësojnë shah, po përhapet si sport e po bëhet më i populluar në qytetin tonë të Pogradecit. Nuk ka qenë kështu por sa vjen e po përmirësohet, po dalin më shumë shahista të rinj e po përhapet edhe nëpër shkolla."

Në këtë edicion të kampionatit amator të shahut, vendi i parë u fitua nga Ermal Rakipllari, vendi i dytë nga Stefi Thëngjilli, ndërsa vendi i tretë nga Stefan Naço. Kampionati i shahut është një event që tashmë ka hyrë në kalendarin e përgjithshëm për aktivitetët në Pogradec. Me kalimin e viteve duket se ky sport ka pësuar një zbehje, ndonëse dikur ka qenë një ndër traditat e qytetit liqenor, megjithatë së fundmi ka një iniciativë konkrete për rikthim të këtij sporti në lartësinë e duhur./ CNA