Holandë-Angli për finalen/ Southgate kërkon historinë, Koeman: Kritikat janë të frikshme

10 Korrik 2024, 11:08, Sport CNA

Holandë-Angli për finalen/ Southgate kërkon historinë,

Holanda dhe Anglia luajnë mbrëmjen e kësaj të mërkure, gjysmëfinalen e dytë të Europianit. Pritet një sfidë e bukur dhe e luftuar nga të dyja ekipet, që duan me çdo kusht kualifikimin për në finalen e madhe.

Në një përballje si kjo, është e vështirë për të zgjedhur favoritin. Dy skuadrat kanë pasur kritika të shumta në këtë Europian, për mënyrën e lojës së treguar.

Te Holanda, Koeman, ka qenë në qendër të ciklonit të kritikave dhe kjo gjysmëfinale mund t’i shërbejë për të ndryshuar mendimin e atyre që e urryen deri tani.

Për këto, trajneri Koeman foli edhe në konferencën për shtyp para ndeshjes, ku kërkoi më shumë respekt nga të gjithë. Gjithashtu ai pranoi se kritikat për Anglinë kanë qenë edhe më të mëdha.

"Mendoj se njerëzit duhet të kenë pak më shumë respekt, kur ndajnë mendimet e tyre për një lojtar apo një trajner. Ky është një problem botëror. Është e vërtetë që tani ka shumë rrjete sociale dhe programe televizive. Depaj është gati që të bëhet golashënuesi më i mirë i kombëtares dhe meriton më shumë respekt. Është sulmuesi im. Unë kam lojtarë të shkëlqyer dhe thjesht duhet edhe pak fat për të shtyrë në rrjetë rastet që kanë pasur. Është e vërtetë që tek Anglia kanë shumë vështirësi për t’i fituar ndeshjet e tyre, por sigurisht që kanë lojtarë të shkëlqyer dhe cilësorë. Kritikat që po marrin ata janë të frikshme, madje më shumë sesa na kritikuan ne pas humbjes me Austrinë. Por i tillë është futbolli dhe duhet të përshtatemi", deklaroi Koeman.

Në krahun tjetër, trajneri i Anglisë, Gareth Southgate, deklaroi se ka ardhur momenti që kombëtarja e tij të bëjë historinë.

"Ka ardhur momenti dhe skuadra është gati për të bërë historinë. Një nga pikat tona të forta ndër vite është fakti se tani kemi më pak frikë dhe jemi më pak të frenuar. Loja do të vendosë zëvendësimet që ne bëjmë. Nuk janë të kushtëzuara se kur apo se kush duhet të zëvendësohet, e gjitha varet nga loja. Gjithmonë duke parë freskinë e ekipit dhe ekuilibrin e ekipit dhe nëse ndryshimet do të bëjnë një përmirësim të ekipit apo jo. Loja do të na çojë në një drejtim të caktuar që do të ndikojë pastaj edhe në vendimet", u shpreh Southgate.

Ndeshja mes Holandës dhe Anglisë është planifikuar të luhet mbrëmjen e kësaj të mërkure, në orën 21:00, ndërsa fituesi do të përballet në finale me Spanjën.