E fundit!

10:56 Aktualitet

"Grusht" në fytyrën e Veliajt/ Gjykata Administrative rrëzon padinë kundër Ols Dados

Gjyqtari Hazbi Balliu ka bërë me dije njoftimin mbi vendi...

“Fundoset” Tirana, Dinamo fiton pas 8 golave

3 Dhjetor 2025, 21:25, Sport CNA

Tirana ka prekur fundin. Bardheblutë u mposhtën me rezultatin e thellë 6-2 nga Dinamo në derbi.

Skuadra e Ilir Dajës tregoi epërsinë në të dyja pjesët e lojës, duke shfrytëzuar hapësirat në mbrojtjen e Tiranës dhe duke ndërtuar aksione të sakta që çuan vazhdimisht në shënim. Për Tiranën, ky ishte një tjetër rezultat negativ që e mban skuadrën në fund të renditjes, duke e rritur presionin për pjesën e mbetur të kampionatit.

Golat nisën herët, në minutën e pestë, kur Guindo shënoi me kokë pas një harkimi nga Bregu. Vetëm gjashtë minuta më vonë, Dinamo dyfishoi rezultatin me një goditje dënimi të realizuar nga Qardaku. Pjesa e parë vijoi me kontroll të plotë nga dinamovitët, të cilët në minutën e 25-të shënuan edhe golin e tretë me Bregun, pas një aksioni të nisur nga Nani në krahun e djathtë.

Tirana arriti të reagojë në minutën e 40-të me një gjuajtje të saktë të Rafaelit nga jashtë zonës, duke ngushtuar përkohësisht shifrat. Pjesa e parë u mbyll 3–1 për Dinamon.

Në pjesën e dytë, dinamovitët e nisën sërish fuqishëm, duke shënuar golin e katërt me Vilën në minutën e 47-të, pas një goditjeje të fortë nga distanca.

Në vijim, Dinamo shfrytëzoi kundërsulmet dhe rikuperimet e shpejta të topit, duke gjetur edhe golin e pestë me Qardakun në minutën e 61-të. Pas rishikimit të një ndërhyrjeje në zonë, skuadra blu fitoi një penallti, të cilën Bregu e shndërroi në gol në minutën e 67-të, duke e çuar rezultatin në 6–1.

Tirana realizoi golin e saj të dytë në minutën e 76-të me Taren, pas një aksioni të ndërtuar në krahun e djathtë nga Mehmeti. Në minutat e mbetura, Dinamo humbi një penallti me Vilën, ndërsa Tirana pati pak tentativa drejt portës, por pa efikasitet.

Ndeshja u mbyll 6–2 për Dinamon, e cila me këtë fitore ngjitet në kuotën e 23 pikëve dhe pozicionohet në vendin e katërt të renditjes.

Për Tiranën, humbja e radhës thellon krizën dhe e lë skuadrën në vendin e fundit me 7 pikë, duke e bërë të domosdoshme një reagim të menjëhershëm në ndeshjet e ardhshme për të shmangur rrezikun e rënies nga kategoria.