web counter
LEXO PA REKLAMA!

SHKARKO APP

App Store
Google Play

E fundit!

x

Dy shtylla dhe spektakël, ndahen pikët në Teuta-Elbasani

3 Dhjetor 2025, 18:38, Sport CNA

Dy shtylla dhe spektakël, ndahen pikët në Teuta-Elbasani

Teuta dhe Elbasani barazuan pa gola mes tyre, në sfidën e javës së 14-të në Superiore.

Pavarësisht rezultatit final 0-0, ndeshja ofroi intensitet të lartë, raste të shumta dhe disa episode të diskutueshme, duke e mbajtur takimin të hapur deri në sekondat e fundit.

Pjesa e parë nisi me ritëm të mirë nga të dyja skuadrat. Elbasani u tregua më kërkues në fazën ofensive, duke u afruar disa herë te zona kundërshtare. Ndërkohë, Teuta u mbrojt me kujdes dhe kërkoi të godiste me kundërsulme të shpejta.

Rasti i parë i rrezikshëm erdhi pas një gabimi të Qoses, por Arifi nuk përfitoi dot për të kaluar në avantazh verdheblutë. Pak minuta më pas, Maçolli gjuajti fort nga distanca, por Janaçek reagoi saktë dhe shmangu golin. Pjesa e parë u mbyll 0-0, me pak raste të pastra për shënim dhe shumë duele fizike në mesfushë.

Pjesa e dytë nisi me tension të shtuar. Në minutën e 50-të, tifozëria vendase ndezi flakadanë, duke krijuar tym të dendur dhe duke detyruar arbitrin Hamiti të ndërpresë përkohësisht lojën. Vetëm disa minuta më vonë, stadiumi u përfshi nga fikja e dritave, që solli një tjetër ndalesë prej 6 minutash.

Pas rifillimit, ritmi i ndeshjes u rrit ndjeshëm. Teuta pati një mundësi të pastër me Beshirajn, por portieri Janaçek reagoi saktë. Jurgen ishte i pafat për durrsakët, pasi goditi shtyllën në minutën e 82-të, duke humbur një nga rastet më të mira të sfidës.

Në kohën shtesë, vendësit rrezikuan sërish me Kotobellin dhe Jazxhin, që gaboi me një goditje me kokë shumë pranë portës.

Pas 12 minutave shtesë, ndeshja u mbyll 0-0, rezultat që lë të dyja skuadrat me nga një pikë. Elbasani mbetet në krye të renditjes me 26 pikë, ndërsa Teuta qëndron në vendin e katërt me 22 pikë.





Lajmet e fundit nga