E fundit!

16:55 Aktualitet

Kuvendi rrëzon kandidaturën për kryetar të Komisionit të Prokurimit Publik

Kuvendi ka rrëzuar kandidaturën e Behar Zenelit për kryeta...

Dëmtimi i Leonit, Chiesa-s i hapet rruga për në Champions

24 Shtator 2025, 20:17, Sport CNA

Dëmtimi i Giovanni Leonit ka ndryshuar planet te Liverpool. Nga kjo situatë mund të përfitojë italiani tjetër, Federico Chiesa.

Fillimi i sezonit për sulmuesin dukej premtues. Pas golit vendimtar ndaj Bournemouth në javën e parë të Premier League, ish-lojtari i Juventusit deklaroi se ishte gati të tregonte vlerat e tij dhe të fitonte hapësira në një nga skuadrat më të mira në botë. Ajo ndeshje ndezi pritshmëritë për një vit ndryshe pas atij të kaluarit, ku u aktivizua vetëm 466 minuta në të gjitha kompeticionet.

Megjithatë, realiteti që pasoi ishte ndryshe. Në tre ndeshjet e radhës të kampionatit, Chiesa mori vetëm 40 minuta lojë. Për më tepër, trajneri Arne Slot vendosi ta linte jashtë listës së Champions League, duke preferuar në vend të tij 17-vjeçarin Rio Ngumoha. Një vendim i vështirë për t’u pranuar, por që Chiesa e kaloi me profesionalizëm. Ai deklaroi se kishte biseduar me trajnerin, kishte kuptuar arsyet dhe se do të vazhdonte të punonte për të pasur mundësitë e tij në Premier Ligë dhe në Kupën e Ligës.

Dhe kjo mundësi erdhi ndaj Southampton në Kupë, ku Chiesa zhvilloi një paraqitje shumë të mirë. Me dy asistime dhe me lëvizjet e tij të vazhdueshme, ai u shpall lojtari më i mirë i ndeshjes, duke treguar se është gati të japë kontributin e tij.

Por në të njëjtën ndeshje ndodhi edhe një episod i trishtë për Liverpulin. Giovani Leoni, mbrojtësi 18-vjeçar i transferuar këtë verë nga Parma, pësoi një dëmtim të rëndë. Pas një përplasjeje dhe një lëvizje të gabuar të gjurit, ai u detyrua të largohej nga fusha me barelë. Ekzaminimet mjekësore konfirmuan këputjen e ligamentit në gjurin e majtë dhe një mungesë që do të zgjasë disa muaj, duke i mbyllur praktikisht sezonin.

Ky zhvillim, megjithëse negativ për Leonin, mund të hapë një dritare të re për Chiesan. UEFA ka futur këtë vit një rregull të ri që lejon zëvendësimin në listën e Champions të lojtarëve që mungojnë për më shumë se 60 ditë për shkak dëmtimi.

Në këtë kuadër, emri i parë që përmendet si alternativë është pikërisht ai i Chiesas. Një ndryshim i mundshëm që do t’i jepte sulmuesit italian shansin e papritur për të marrë pjesë në garën më prestigjioze të klubeve europiane, duke i dhënë një kthesë të rëndësishme sezonit të tij.