LEXO PA REKLAMA!

SHKARKO APP

Zysh Ina na u kthye në Atdhe

9 Mars 2024, 15:01, Sociale Erion Kristo

Zysh Ina na u kthye në Atdhe

Gazetari dhe moderatori Erion Kristo ka falenderuar të gjithë shqiptarët për kontributin që kanë dhënë në lidhje me rastin e Ina Kasimatit e cila është rikthyer në Vlorë, pas betejës me sëmundjen.

ZYSH INA U KTHYE NË ATDHE

Ina Kasimati zbriti dje në areoportin "Nënë Tereza", për t'u nisur më pas për në Vlorën e saj.

E gjitha kjo u mundësua nga qindra qytetarë të cilët u angazhuan për të bërë të mundur kthimin e saj në Shqipëri. Ina ishte shumë e emocionuar, teksa preku tokën e saj. U nis më e fortë se kurrë për në Vlorë, pasi Ina nuk e njeh dorëzimin. Na përqafoi, na përshëndeti dhe së bashku me djalin e saj, u nisën për në shtëpi.

Ina ka qenë shumë e emocionuar që shqiptarë të shumtë, të njohur e të panjohur, e plotësuan dëshirën e saj për t'u kthyer në Atdhe.

Ju është shumë mirënjohëse dhe falënderuese.

E ndikuar nga gjithë kjo çfarë bëmë për Inën, ajo do të vazhdojë më shumë se asnjëherë të luftojë për jetën, pasi mësuesja e Çajupit, e do jetën.

Ina zbriti në Shqipëri më 8 mars, në ditën e gruas, si për të treguar forcën që bart kjo qenie, për të qenë e fortë, e pamposhtur, luftarake, e krenare.

Sqarim:

1. Charteri mjekësor që solli zysh Inën në Shqipëri pati një kosto prej 20.900 eurosh. Kjo pasi charteri me të cilin ishte dakordësuar në fillim, nuk mund të fluturonte kur Ina kërkonte të kthehej. Na u desh të komunikonim me një kompani tjetër.

1.1 Pagesa e charterit mjekësor ende nuk është bërë, pasi transferimi i parave nga gofundme, kërkon procedura dhe kohë. Ndërsa Ina nuk mund të priste më. Duhej të kthehej patjetër, siç i kishte kërkuar edhe mjekja që e ndiqte. Prandaj gjej rastin të falënderoj kompaninë, Arlo Travel & Blu Tour Operator, të cilët na mirëkuptuan duke i kryer vetë pagesat, me mirëkuptimin që sapo paratë të kalojnë në llogari, ne do të kryejmë pagesën e nevojshme.

2. Sa i takon pjesës tjetër të parave. Me kërkesë të vetë Inës, ato do të kalojnë në llogarinë e të vëllait, i cili do i përdorë për nevojat e Inës, (pasi ka nevoja shumë) dhe të djalit të saj të vogël Amantit. Kjo është dëshira e Inës. Për gjithë sa thashë, janë të dokumentuara për çdo transparencë të mundshme, që tek interesat e gofundme e të transfertave, dhe udhëtimi me charter. Ina ka qenë dhe është në dijeni të çdo veprimi.

3. Falënderoj pafund edhe Dhurata Hysa dhe Skender Brataj të cilët mundësuan ambulancën, së bashku me ekipin mjekësor në gatishmëri për të transportuar Inën në Vlorë.

Zoti ju bekoftë të gjithëve për çfarë keni bërë. Zoti i dhëntë Inës forcë për të luftuar e për të qenë mirë.

P.S. Teksti u shkrua nga gazetari dhe luftëtari i së mirës Osman Stafa .

Nga ana ime, falënderoj në veçanti të gjitha autoritetet që na ndihmuan për të kryer procedurat e nevojshme dhe për përkushtimin e tyre human: drejtuesit e policisë, të ministrisë dhe të aeroportit. Si dhe Fjori Sinoruka që ishte me ne.

Por falënderimi më i zjarrtë shkon për qindra shqiptarë zemërartë që nuk u kursyen. Ua dua zemrën!

Lajmet e fundit nga