E fundit!

14:42 Editorial

Çmenduria e një avokati të pandehur

Plarent Ndreca na qenka bërë sot autor i një zbulimi epoka...

Komunitetet fetare apelojnë për bashkëpunim dhe tolerancë

8 Qershor 2023, 20:49, Sociale CNA

Gjatë vizitës që zhvilluan sot në katedralen e Shën Shtjefnit në qytetin e Shkodrës, drejtuesit e komuniteteve fetare të Shqipërisë theksuan rëndësinë e tolerancës dhe bashkëpunimit jo vetëm mes besimtarëve, por edhe politikës, si në Shqipëri, ashtu edhe në Kosovë.

Tensionet e forta politike, vështirësitë sociale dhe ekonomike me të cilat po përballen shqiptarët, por edhe emigracioni i të rinjve, janë një sinjal për reflektim nga të gjithë, tha imzot Arjan Dodaj, arqipeshkvi i Tiranë-Durrësit.

“Është një mesazh për të gjithë. Krerët fetarë kanë një përgjegjësi morale dhe ndërgjegjja i përket çdo njeriu. Me fe, pa fe, të gjithë kanë një ndërgjegje morale. Dhe ky është gjykatësi i parë me të cilin do të ballafaqohemi çdo ditë kur shkojmë në mëngjes, kur shkojmë në darkë. Kështu që, mos të flasim për Shqipërinë, por t’a ndërtojmë Shqipërinë së bashku. Dhe së bashku të kultivojmë ëndrrat dhe shpresat e brezave të rinj. Edhe për ata ka vend në Shqipëri. Kështu që, së bashku t'a rindërtojmë Shqipërinë”, tha ai.

Është e rëndësishme, tha Kryetari i Këshillit Ndërfetar i Shqipërisë, Bujar Spahiu, që si politika, ashtu edhe qytetarët t’a kuptojnë se mund të jetohet në harmoni dhe në vlerat e përbashkëta.

“Dhe sot, që jemi së bashku si Këshill Ndërfetar i Republikës së Shqipërisë dhe që nuk gjendet në asnjë vend të botës, një këshill i ndërtuar me krerët fetarë të këtij vendi, tregon edhe një herë panoramën e bukur të cilën duhet t’a shikojnë brezat e rinj. Pavarësisht mendimeve apo fesë që i takojmë, besimit që kemi, jetohet në harmoni dhe në vlerat tona të përbashkëta”, tha ai.

Harmonia ndërfetare, tha zoti Spahiu, është pasuria më e madhe që kanë shqiptarët dhe për këtë të gjithë krenohen. Por, ai shtoi se përballë sfidave të kohës, të gjithë duhet të punojnë për të ruajtur këtë harmoni ndërfetare.

“Imun nuk jemi përballë sfidave globale, pasi çdo gjë që ndodh në botë dëgjohet dhe vlerësohet kudo. Dhe kjo panoramë neve na jep një shtysë më shumë që të rendim pas kësaj harmonie, që t’a ruajmë sa më shumë”, theksoi zoti Spahiu.

Mesazhe bashkimi dhe bashkëpunimi përcollën sot edhe përfaqësuesit e tjerë të komuniteteve fetare të Shqipërisë; Kryegjyshi Botëror i Bektashinjve, Haxhi Dede Edmond Brahimaj, ndihmësi i Kryepeshkopit Anastas, Hirësi Asti, si dhe Arqipeshkvi i Shkodër- Pult, imzot Angelo Massafra.

Në momente të rëndësishme të kombit, por edhe të ekzistencës së tij, krerët e komuniteteve fetare të shqiptarëve kanë përçuar gjithnjë mesazhe të rëndësishme bashkimi dhe tolerance, duke reflektuar në jetën e përditshme të shqiptarëve, por edhe të politikës/ VOA