Forumi Shkencor mbi investimet në shërbimet kirurgjikale, Manastirliu: Reduktohen infeksionet spitalore

24 Korrik 2023, 11:56, Shëndeti CNA

Forumi Shkencor mbi investimet në shërbimet kirurgjikale, Manastirliu:

Në Forumin Shkencor mbi 'Investimet efektive në shërbimet kirurgjikale dhe ndikimi në shëndetin e pacientëve', me pjesëmarrjen e ekspertëve të Institutit të Shëndetit Publik, mjekë të QSUT-së dhe drejtues të Universitetit të Mjekësisë, Ministrja e Shëndetësisë dhe Mbrojtjes Sociale, Ogerta Manastirliu, ka vënë theksin në përfitimet në shëndet që kanë sjellë investimet në shërbimet kirurgjikale.

"Vlerësohet që ditëqëndrimi është ulur me 2 herë, krahasuar me fillimet e punës sonë, kur infeksionet e plagëve operatore ishin mbi 35%. Reduktimi tyre, tashmë ndër vite është një fakt, i cili, jo vetëm është i matshëm, por ajo që është me rëndësi është që jeta e qytetarëve sot është më e sigurt dhe pacienti sot në spital, jo vetëm merr shërbim më shpejt, por edhe shërimi i tij ndodh më shpejt, pikërisht në sajë të investimeve të kryera dhe punës që bëjnë profesionistët tanë në strukturat spitalore të kirurgjisë. Nga momenti i pikënisjes së këtij programi, të sterilizimit dhe instrumenteve kirurgjikale, janë mbi 400 mijë ndërhyrje të kryera në sistemin shëndetësor me standarde evropiane",- tha Ministrja Manastirliu.

Gjatë këtij forumi shkencor, Ministrja e Shëndetësisë dhe Mbrojtjes Sociale tha se është ulur ndjeshëm edhe përdorimi i antibiotikëve, por nga ana tjetër, u ka kërkuar drejtuesve të spitaleve, standardizimin e protokolleve në këtë drejtim, me qëllim ruajtjen e shëndetit të qytetarëve.

"Të dhënat e studimit të ISHP-së, në raport me vitin 2014, tregojnë se është ulur me 20% përdorimi i antibiotikëve në ditët postndërhyrje dhe besoj që këtu kemi shumë për të thenë në raport me atë që spitalet duhet të bëjnë.

E para, drejtuesit e spitaleve, së bashku me stafet teknike dhe me njësitë e infeksioneve spitalore, duhet që të kenë në mënyrë periodike evidencat e përdorimit të antibiotikëve. Nuk ka më asnjë justifikim te përdorimi i antibiotikëve pa të gjithë analizat mikrobike, sepse nuk mund të përdoren antibiotikët se kështu ka qenë bërë dhe të vazhdojmë me modelin e vjetër. Eshtë përgjegjësi e drejtuesve të institucioneve dhe stafeve teknike për t’i shpallur luftë antibiotiko-rezistencës",- tha Manastirliu.

Prof. Arben Gjata tha se falë investimeve të kryera dhe programit të sterilizimit ka indikatorë të përmirësuar vitet e fundit, siç janë ulja e ditëqëndrimit në spital dhe reduktimi i infeksioneve spitalore.

"Nëse e marrim nga viti 2019 gati 90% e operacioneve bëheshin me kirurgji tradicionale, kirurgji të hapur, e cila rriste riskun. Sot mbi 98% realizohen totalisht në mënyrë laparoskopike, gjë që ul ditëqëndrimin, ul riskun e infeksioneve", - u shpreh prof. Gjata.

Të dhënat studimore të Institutit të Shëndetit Publik në Forumin Shkencor për 'Investimet Efektive në Shërbimet Kirurgjikale. Ndikimi në Shëndetin e Pacientëve', tregojnë qartë për efektin pozitiv të programit të sterilizimit dhe instrumeneteve të reja kirurgjikale në reduktimin e infeksioneve spitalore, duke rritur sigurinë për shëndetin dhe jetën e pacientëve.

Studimi i kryer nga ISHP, krahasoi të dhënat e infeksioneve spitalore, infeksioneve të plagëve operatore dhe shpërthimet epidemike të ndodhura përpara apo pas vitit 2014 dhe pas vitit 2021. Gjithashtu u krye vlerësimi i përdorimit të antibiotikëve dhe infeksioneve spitalore në të njëjtat periudha në disa spitale të vendit (Spitali Rajonal Lezhë, Spitali Rajonal Vlorë, Spitali Universitar 'Shefqet Ndroqi' dhe Klinika 3 Kirurgjikale e Qendrës Spitalore Universitare “Nënë Tereza”, Tiranë).

Të gjithë treguesit tregojnë se: Gjatë vitit 2021 vihen re më pak infeksione të plagëve operatore, ku nuk ka pasur izolime për patogjenë të ndryshëm në karahasim me vitet e mëparshme. Gjatë vitit 2021 nuk janë vënë re shpërthime epidemike në spitalet e vendit nga infeksionet spitalore që tregon një përmirësim të mjedisit spitalor, sterilizimit dhe dezinfektimit e masave të tjera.

Në studim u evidentua një rënie me 2 herë e ditëqëndrimit spitalor si dhe rënie në 20% të rasteve të pacienteve që kanë përdorur antibiotikë në shërbimet kirurgjikale, që lidhet në mënyrë të drejtpërdrejtë edhe me uljen e infeksioneve që trajtohen me to./ CNA