A thinjesh më shpejt kur je i stresuar? Përgjigjen ekspertët

7 Gusht 2024, 08:14, Shëndeti CNA

A thinjesh më shpejt kur je i stresuar? Përgjigjen ekspertët

Foto ilustruese

Flokët thinjen kur trupi resht së prodhuari pigmentin melaninë që është përgjegjëse për ngjyrën e flokut. Bëhet fjalë për një proces natyral që shkon krah për krah me moshën.

Tradita shqiptare i quan flokët e bardhë si shenjë fisnikërie. Por ata që i mbajnë thinjat, sidomos në moshë të re, duan disa përgjigje se pse u ka ndodhur të zbardhen para kohe. Përgjigjja është: stresi.

Ekspertët thonë se stresi është një nga shumë faktorët që nxit thinjen e flokut. Një studim i publikuar në revistën "Nature", të cilit i referohet AgroWeb.org, shpjegon se stresi nxit në organizëm mekanizmin “lufto ose mbathja” që nëse mbetet aktiv shkakon shumë probleme në organizëm.

Kur njeriu është i stresuar, në organizmin e tij vërehet një prani e lartë e kortizolit, por edhe disa ndryshime në sistemin nervor simpatetik. Ky sistem përbëhet nga shumë nerva, të cilat lidhen gjithashtu me çdo fije floku.

Substancat që çlirohen në trup si pasojë e stresit shuan aftësinë rigjeneruese të pigmentimit duke zhveshur flokun nga ngjyra natyrale.

Megjithatë, stresi nuk është i vetmi faktor që nxit thinjen e flokut. Ekspertët kanë identifikuar disa prej shkaqeve të mëposhtme të zbardhjes së flokëve.

Problemet në ushqyerje

Sipas të dhënave të Agroweb.org, mungesat e vitaminave B12, zinkut dhe bakrit shkaktojnë shfaqjen e parakohshme të thinjave. Këto ushqyes ndihmojnë në procesin metabolik që u jep flokëve ngjyrën natyrale.

Faktori gjenetik

Në shumë raste, faji pas shfaqjes së hershme të thinjave qëndron te faktori gjenetik. Në këtë rast, thinjat janë realitet i pandryshueshëm.

Ndotja mjedisore

Ndotja e përditshme që rrezikon flokun e dobëson shumë atë. Këto goditje të njëpasnjëshme shkaktojnë eventualisht zbardhje të tij.

Duhani

Radikalet e lira që prodhohen nga pirja e duhanit shkaktojnë stres oksidues që dobëson prodhimin e melaninës dhe nxit zbardhjen e flokut.

Tiroidja

Ekspertët thonë se njerëzit që vuajnë nga tiroidja kanë tendencën të thinjen përpara kohe. Ky problem vërehet kryesisht në rastin e hipertiroidizmit që shoqërohet edhe me hollim të flokut.

Ushqimet më të mira kundër thinjes së flokëve

Ushqimet që hamë luajnë një rol të rëndësishëm në ngjyrën dhe shëndetin e flokut.

Bajamet

Bajamet duhet të bëhen pjesë e regjimit tuaj ushqimor sepse janë shumë të pasura me vitaminë E, e cila është shumë e rëndësishme për shëndetin e flokëve.

Arrat

Arrat janë të pasura me biotinë. Kjo vitaminë ul numrin e thinjave dhe përmirëson paraqitjen e flokut.

Barishtet

Spinaqi, selinoja, specat, lakra, kastraveci e barishtet janë shumë të pasura me vitamina dhe minerale të cilat ushqejnë flokun dhe pengojnë shfaqjen e thinjave.

Salmoni

Salmoni është shumë i pasur me selenium që ndihmon në prodhimin e hormoneve të dobishme për flokun. Për më tepër, salmoni përmban proteina të cilat pengojnë thinjen e tij./AgroWeb.org