E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Turistët amerikanë në Shqipëri/ “Natyra fantastike, vend shumë mikpritës”

18 Tetor 2024, 14:48, Qyteti im CNA

Vizitorë nga Amerika zgjedhin të vizitojnë Shqipërinë, ndërsa ndalen edhe në fshatrat e thella të qarkut të Korçës. Strelca është një nga fshatrat e Maliqit që ofron një pamje të mrekullueshme të natyrës, me shkëmbinj të mëdhenj që të shoqërojnë gjatë gjithë rrugës, që i japin një tjetër pamje këtij fshati.

Strelca ndodhet rreth 30 km larg qytetit të Maliqit, por terreni malor e bën paksa të vështirë ngjitjen në këtë fshat. Duket se kjo vështirësi nuk i ka ndaluar turistët amerikanë të shkojnë pranë këtij fshati piktoresk.

Turistët të shoqëruar nga një shqiptar, kanë shijuar prej 5 ditësh bukuritë e Shqipërisë, duke e nisur nga Shkodra e duke përfunduar në juglindje. Ndalesa e radhës për ta do të jetë qyteti i Beratit.

Për amerikanët, Shqipëria është një vend i mrekullueshëm, që ofron mikpritjen dhe gatimet tradicionale aq të veçanta e të shijshme.

Këto kanë qenë arsyet që dy çiftet vendosën që për herë të parë të vinin në Shqipëri. Ata tregojnë pikënisjen e udhëtimit të tyre 10-ditor, duke ngelur të mahnitur nga ajo që kanë gjetur në Shqipëri.

"Është hera jonë e parë që udhëtojmë të katërt, jemi nga Amerika, New Hampshire. Për ne është hera e parë në Shqipëri, kemi rreth 5 ditë këtu dhe kemi një shok të mrekullueshëm shqiptar, Tonin, i cili po na tregon vende të bukura dhe po na ndihmon që të shohim turizmin në këtë vend. Kemi vizituar dje liqenin e Prespës, udhëtuam me varkë dhe hëngrëm peshk për drekë me familjet atje. Ishte një udhëtim i mrekullueshëm."

Sapo mbërritën në Strelcë, aty vunë re pemët e arrës që janë me shumicë në këtë fshat, ndërsa tregojnë se nuk patën mundësi të shijonin më gjatë edhe Korçën e bukur.

"Sapo mbërritëm këtu (në Strelcë) dhe shohim që ka shumë pemë arre që ne i kemi shumë qejf. Toni na tregoi që ka qenë disa herë këtu dhe na e sugjeroi për ta vizituar për shkak se është një vend i këndshëm. Në Korçë thjesht kaluam sepse kemi vende të tjera që kemi vendosur të shkojmë, fatkeqësisht nuk patëm kohë të ndalonim në qendër të qytetit që ta shihnim. Sot do të nisemi për Berat, kemi vendosur të shëtisim në Shqipëri për 10 ditë, pra jemi në gjysmë të udhëtimit."

Udhëtimi i tyre ka nisur prej Shkodrës ku vizituan disa nga destinacionet më të veçanta atje, e duke bërë not në mes të muajit tetor në Lumin e Shalës pasi moti atë ditë ishte mjaft favorizues. Pas Shkodrës, ndalesa e radhës ishte në Prespë ku provuan peshkun si gatimin tradicional të zonës.

Turistët amerikanë në Shqipëri/ “Natyra fantastike,

"Ne jemi nga New Hampshire i SHBA, po udhëtojmë katër persona dhe donim të bënim pushime që lidhen me ekoturizmin. Kemi Tonin si guidë shumë të mirë dhe po shkojmë në shumë vende të bukura. Shqipëria qenka vend me shumë male.

Ne shkuam në liqenin e Shkodrës, afër kufirit me Malin e Zi, më pas në Koman, Lumin e Shalës ku edhe notuam, edhe pse është mes tetori, por ishte shumë bukur dhe ne u treguam guximtarë sepse dhe koha ishte shumë e mirë e na ndihmoi. Më pas shkuam në Mrizi i Zanave, hëngrëm një ushqim shumë të mirë atje, e më pas mbërritëm në Prespë ku bëmë një xhiro në liqenin e Prespës. Provuam po ashtu ushqimin tradicional dhe verën e atij vendi, shumë udhëtim i bukur.

Për Shqipërinë, turistët amerikanë ndihen mjaft të kënaqur që vendosën ta vizitonin duke thënë se ka vende interesante me natyrë fantastike dhe mikpritjen e banorëve.

Së pari, po mendonim të shkonim në Greqi, më pas filluam të mësonim më shumë për Shqipërinë dhe kuptuam që është vend shumë i bukur për t'u vizituar, për shkak të mikpritjes dhe të vendeve interesante dhe me natyrën fantastike. Jemi shumë të kënaqur që vendosëm të vinim në Shqipëri."

Shqipëria dhe më konkretisht qytetet e juglindjes ofrojnë një sërë atraksionesh turistike që çdo vit e më shumë po afrojnë vizitorë nga vendet e largëta të botës. Ata zgjedhin ta vizitojnë vendin për të parë nga afër bukuritë natyrore, për të takuar popullin shqiptar e për të provuar gatimet tradicionale të çdo zone./ CNA