web counter
LEXO PA REKLAMA!

SHKARKO APP

App Store
Google Play

E fundit!

x

Zgjedhjet e 11 majit/ Shtyhet afati i vlefshmërisë për dokumentet e identifikimit

7 Maj 2025, 14:26, Politikë CNA

Zgjedhjet e 11 majit/ Shtyhet afati i vlefshmërisë për dokumentet

Ministri i Brendshëm, Ervin Hoxha në një deklaratë për mediat ka njoftuar se është shtyrë afati i vlefshmërisë për dokumentet e identifikimit, në kuadër të zgjedhjeve të 11 majit.

Hoxha tha se ky vendim erdhi pasi rezulton të jetë një numër i konsiderueshëm i shtetasve me të drejtë vote, të cilëve u ka skaduar apo u skadon dokumenti i identifikimit deri më 11 maj.

 

Deklarata e plotë

 

Në mbledhjen e sotme të Këshillit të Ministrave u miratuan dy akte shumë të rëndësishme për shtyrjen e afatit të vlefshmërisë së dokumenteve të identitetit, të cilave u ka skaduar ose u përfundon ky afat në datë 11 maj 2025, për shtetasit me vendbanim brenda territorit të Republikës së Shqipërisë.

Nga një analizë e të dhënave, rezulton se janë një numër i konsiderueshëm shtetasish me të drejtë vote, të cilëve u ka kaluar apo u skadon afati i vlefshmërisë së letërnjoftimit elektronik dhe pasaportave biometrike deri në 11 Maj. Këto janë dokumente të domosdoshme për të marrë pjesë në procesin e votimit. 

Miratimi i akteve normative merret me qëllim garantimin e të drejtës kushtetuese së të gjithë shtetasve për të votuar pa pengesa, në zgjedhjet e përgjithshme parlamentare.

Sipas këtij vendimi, afati i vlefshmërisë së mjeteve të identifikimit, letërnjoftime elektronike dhe pasaporta biometrike që përfundojnë në datën 11 maj 2025 - shtyhet deri në datën 31 maj 2025.

Së fundmi, subjekte politike i kanë kërkuar KQZ, Ministrisë së Brendshme dhe Këshillit të Ministrave, shtyrjen e afatit të vlefshmërisë së dokumenteve të skaduara.

Bëjmë me dije se, në janar 2025, KQZ iu drejtua qeverisë nëpërmjet një kërkese lidhur me problemin e vlefshmërisë së dokumenteve të identifikimit për shtetasit që jetojnë jashtë Shqipërisë.

Në Shkurt 2025 u miratuan Aktet Normative, që kishin të bënin me shtyrjen e afatit të vlefshmërisë së dokumenteve për shtetasit shqiptarë në diasporë.

Ministria e Brendshme në bashkëpunim me KQZ, institucionet  e varësisë, si Shërbimi i Gjendjes Civile, apo agjencitë e tjera, kanë ndërmarrë të gjitha masat në përmbushje të detyrimeve ligjore, për të siguruar që procesi zgjedhor i 11 Majit të zhvillohet në mënyrë të qetë dhe pa pengesa për qytetarët tanë jashtë dhe brenda kufijve.

Janë marrë ndërkohë të gjitha masat për mbarëvajtjen e procesit zgjedhor nga pikëpamja e sigurisë. Policia e Shtetit do të kalojë në shërbim të përforcuar për të përballuar me sukses procesin para, gjatë dhe pas mbylljes së votimit, duke zbatuar me korrektësi ligjin dhe detyrimet që rrjedhin nga Kodi Zgjedhor.

Duke përfituar nga ky komunikim, dua të bëj më dije gjithë qytetarët, se po punohet intensivisht për të garantuar mbarëvajtjen e aktiviteteve të rëndësishme që do të mbahen këto ditë në Shqipëri, që janë “Giro d’Italia” në datat 8, 9 dhe 10 maj, si dhe Samiti i Komunitetit Politik Europian, që do të mbahet më 16 maj, në Tiranë. 

Kërkoj mirëkuptimin e qytetarëve për bllokimet e detyrueshme në lëvizje dhe qarkullim rrugor, të cilat siç kanë nisur të njoftohen, do të bëhen publike me detaje nga ana e Drejtorisë së Përgjithshme të Policisë së Shtetit./ CNA

 





Lajmet e fundit nga