web counter
LEXO PA REKLAMA!

SHKARKO APP

App Store
Google Play

E fundit!

x

Vrasja e gjyqtarit Kalaja/ Ministri Lamallari: Ky akt kriminal nuk do ta frikësojë drejtësinë

6 Tetor 2025, 18:25, Politikë CNA

Vrasja e gjyqtarit Kalaja/ Ministri Lamallari: Ky akt kriminal nuk do ta

Ministri i Drejtësisë, Besfort Lamallari ka reaguar para pak minutash për vrasjen e gjyqtarit të Gjykatës së Apelit, Astrit Kalasë në sallën e gjyqit.

Lamallari është shprehur në reagimin e tij se kjo ngjarje është një sulm ndaj çdo institucioni të drejtësisë shqiptare. Ai thekson se vrasja e gjyqtarit duhet të marrë ndëshkimin më të ashpër nga ligji.

Ministri thotë se duhet rishikuar sistemi i sigurisë së brendshme nëpër gjykata dhe gjithashtu duhet ashpërsuar dënimi për armëmbajtje pa leje në Kodin e ri Penal. Ai gjithashtu shton se ky akt kriminal nuk do të frikësojë drejtësinë dhe as misionin e magjistratëve.

Postimi i plotë:

Sulmi vdekjeprurës me armë ndaj gjyqtarit të Gjykatës së Apelit Astrit Kalaja është sulm ndaj çdo shërbyesi të së drejtës, institucioneve dhe shoqërisë shqiptare.

Ky akt i rëndë kriminal duhet dënuar me të gjithë forcën e ligjit dhe siguria e jetës dhe integritetit fizik të njerëzve të drejtësisë është një vijë e kuqe që askush nuk duhet ta kalojë e që shteti do ta mbrojë me vendosmëri e me çdo çmim.

Vrasja e gjyqtarit Kalaja në krye të detyrës është një akt kriminal që meriton ndëshkimin më të ashpër me të gjithë forcën e ligjit. Ne nuk do të lejojmë që sulme si ky dhe i asnjë forme tjetër të cënojnë besimin e publikut te drejtësia e as të errësojnë përpjekjet tona të vijueshme për forcimin e shtetit të së drejtës në Shqipëri.

Paralelisht me nevojën e rishikimit e sistemit të sigurisë së brendshme nëpër gjykata, pashmangshmërisht duhet të ashpërsojmë dënimin për armëmbajtjen pa leje në Kodin e ri Penal, për të cilin tashmë kemi nisur konsultimin publik. Armëmbajtja pa leje si vepër penale nuk do të trajtohet më siç është trajtuar deri më sot.

Siguria e njerëzve të drejtësisë është një vijë e kuqe që askush nuk duhet ta kalojë. Asnjë akt kriminal si ky i sotmi nuk do të mundet kurrë të frikësojë drejtësinë e as misionin e magjistratëve. Ministria e Drejtësisë qëndron në krah të institucioneve të drejtësisë.

Në këto momente të vështira, shpreh ngushëllimet më të sinqerta për familjen e gjyqtarit të ndjerë Astrit Kalaja, për të afërmit, kolegët e tij dhe për të gjithë trupën gjyqësore.

I uroj shërim të shpejtë dy personave të tjerë të mbetur të plagosur nga ky akt kriminal.

U prehsh në paqe i nderuar gjyqtar Kalaja!/CNA





Lajmet e fundit nga