Veliaj “harron” hallet e tij me drejtësinë, merret me opozitën

17 Qershor 2024, 19:40, Politikë CNA

Veliaj “harron” hallet e tij me drejtësinë, merret me

Kryebashkiaku Erion Veliaj, foto e shkëputur nga aktiviteti i tij

Kryebashkiaku Erion Veliaj, nga Njësia 7, ka vijuar me të njëjtën retorikë politike duke sulmuar protestat e opozitës të bëra para Bashkisë së Tiranës, apo para Parlamentit.

Sipas Veliajt, opozita di të komunikojë vetëm me gjuhën e dhunës.

Edhe pse e drejta për të protestuar, është e drejtë legjitime që qytetarët nëpër botë e ushtrojnë, Veliaj tha se protestat e opozitës duhet të ndalen, pasi po shqetësojnë turistët e huaj, që dinë më së miri ta ushtrojnë këtë të drejtë prej dekadash.

“Jemi në vitin 2024, ata janë ende si në ‘97. Edhe atëherë me hu dhe me dru, edhe sot me hu dhe me dru. Nuk është puna a kanë apo s’kanë vulë, janë në opozitë apo janë në qeveri, ata [PD] dinë të flasin vetëm më atë lloj gjuhe. Turistët vijnë të fotografojnë qytetin, por tmerrohen para bashkisë dhe parlamentit se shikojnë këtë Kopshtin Zoologjik që djeg goma. Ka edhe një parti tjetër në botë që djeg goma, janë talibanët. Ndaj jemi të destinuar të fitojmë, që t’i mundim, si e vetmja forcë që civilizon vendin, që sjell frymë europiane, dukje europiane, fjalime europiane. Është detyrë kombëtare të vazhdojmë të fitojmë”, u shpreh ai.

Ashtu siç e ka raportuar CNA, hetimet për inceneratorin e Tiranës janë drejt fundit, ndërsa priten të tjera urdhër-arreste ndaj drejtorëve, përfshirë vetë kryebashkiakun.

SPAK, në aksion/ Orët e makthit të Erion Veliajt
17 Qershor, 16:53
Ekskluzive- SPAK thellon hetimet për Veliajn dhe drejtorët e tij hajdutë
8 Qershor, 16:57

Në panik nga këto hetime, Veliaj ka dashur të shmangë vëmendjen nga problemi i tij, duke u marrë me ato të opozitës. Sipas tij, ai e mbështet punën e drejtësisë së re, ndryshe nga opozita.

Edhe pse faktet tregojnë se Veliaj më shumë i trembet përgjegjësisë, pas hetimeve të thelluara të Prokurorisë së Posaçme, bërë për një sërë dosjesh, që nga “5D”, e deri tek inceneratori inekzistent i Tiranës.

“Kur janë te ajo rrugica para bashkisë, thonë Rroftë Drejtësia. Kur janë te rrugica “Mustafa Matohiti”, thonë Poshtë Drejtësia. Kurse ne themi, kush ka bërë gabime, të shkojë t’i sqarojë. Ç’është kjo dyfytyrësi? Si mund të ndryshosh qëndrim për 30 minuta?! Ndaj miq, nuk është vetëm dëshirë dhe pasion, është detyrë patriotike të vazhdojmë të fitojmë, të drejtojmë Shqipërinë dhe Tiranën”, theksoi ai.

Kryebashkiaku thotë se opozita është me dy standarde sa i përket drejtësisë, edhe pse veprimet e tij të fundit dëshmojnë të njëjtën gjë./ CNA