Veliaj dhe mediat e inceneratorëve, në sulm mafioz ndaj prokurorëve dhe gjykatësve

23 Shkurt 2025, 19:57, Politikë CNA

Veliaj dhe mediat e inceneratorëve, në sulm mafioz ndaj

Drejtuesi politik i Partisë Demokratike për Tiranën, Belind Këlliçi ka reaguar kundrejt kërcënimeve të lëshuara nga Erion Veliaj, ndaj gjyqtarëve dhe prokurorëve. Këlliçi ka reaguar ashpër pas sulmeve dhe kërcënimeve të kryebashkiakut Erion Veliaj, ndaj prokurorit të çështjes Ols Dado dhe gjyqtarit Erjon Bani. Veliaj ndodhet në qeli me vendimin të GJKKO, por nga burgu ka filluar një fushatë denigruese dhe kërcënuese nga njerëzve të drejtësisë.

Këlliçi është shprehur se presioni i ushtarëve mediatikë të Veliajt nuk tremb askënd, ndërsa i bën thirrje çdo dëshmitari, të mos bjerë pre e këtij presioni banal.

Reagimi i plotë i Belind Këlliçit:

Gjuha prej një rrugaçi ordiner dhe kërcënimet e kreut të 5D, të lëshuara ditët e fundit drejt prokurorit të SPAK Olsi Dado dhe gjyqtarit të GJKKO Erion Bani, është në fakt një mesazh i qartë dhe i koduar mafioz, për dëshmitarët të kthyer në ‘pentito’, të cilët me dëshmitë e tyre kanë faktuar përtej çdo dyshimi, përfshirjen e Erion Veliajt në korrupsion madhor si kryetar i Bashkisë Tiranë!

Pronari faktik i Inceneratorit Tiranë nuk shqetësohet aspak për rëndimin e pozitës së tij penale, për shkak të Nenit të Kodit Penal që dënon me burg personat që fyejnë gjyqtarët apo prokurorët për shkak të veprimtarisë së tyre, pasi ai e ka të qartë që me akuzat e faktuara ndaj tij, edhe 3 apo 6 muaj burg për shkak të fyerjeve, nuk i bëjnë asnjë diferencë.

Veliaj, sëbashku me ushtarin e tij mediatik, Leçjanin Karlo Bollino dhe mediat e drejtuara prej tij që paguhen me paratë e Inceneratorit fantazmë të Tiranës, kanë nisur një sulm frontal dhe denigrimin publik me shpifje e fyerje ndaj prokurorëve e gjyqtarëve specialë, pikërisht për të dhënë mesazhin se nuk e dini ende se me kë jeni ngatërruar!

Dyshja Veliaj - Bollino, njëri tashmë në burg dhe tjetri nën hetim nga SPAK, për grabitje të 4100m2 truall dhe fondeve publike përmes AKSH-it, duan të trembin dëshmitarët e dosjes së Nesti Angonit dhe të tjerët që kanë nisur të flasin sërish për skemën kriminale 5D dhe Inceneratorin Tiranë.
Janë të mbaruar!
Presioni i tyre nuk tremb askënd!

I bëj thirrje publike çdo dëshmitari, të mos bjerë pre e këtij presioni banal, që është një armë e fundit e dëshpëruar, e atyre që e dinë mjaft mirë se çfarë i pret, për shkak të makutërisë së tyre të pashembullt!