SPAK e la në detyrim paraqitje/ Reagon Berisha: Urdhër i Ramës

21 Tetor 2023, 21:27, Politikë CNA

Ish-kryeministri Sali Berisha ka reaguar për herë të parë pasi SPAK caktoi masën detyrim paraqitje ndaj tij për çështjen e privatizimit të ish-kompleksit Partizani, pasi e akuzon për korrupsion, pastrim parash dhe fshehje të pasurisë.

Berisha hodhi akuza ndaj kryeministrit Edi Rama, duke pretenduar se ka urdhëruar prokurorët të nxjerrin vendime të shkelin Kushtetutën.

“Rama urdhëroi prokurorët e tij mercenarë, të denoncuar publikisht në këtë sallë për fshehje dokumentesh, për manipulim dosjesh, për bashkëpunim me krimin dhe bandat për të lëshuar urdhër në kundërshtim me Kushtetutën”, u shpreh ai ndër të tjera.

Më tej, ish-kryeministri deklaroi se do të pranojë sfidën që të hiqet neni 73 në Kushtetutë, që pretendon se u shkel me vendimin e SPAK.

Pjesë nga deklarata:

Edi Rama ka hyrë në agoninë e tij politike!

Ai, i tronditur gjer në palcë nga krimet e tij, nga aferat në të cilat nuk ka drejtësi në botë që e shpëton, afera McGonigal, afera e djegësve, afera e sterilizatorëve, afera e Portit të Durrësit, afera e Butrintit.

Edi Rama, pasi ka humbur mandatin e deputetit, siç thotë Kushtetuta, me tenderat që ka fituar në kundërshtim me Kushtetutën dhe ligjet e vendit, thjeshtra e tij me emrin Xhillari në kompaninë I Riu, me tenderat që ka fituar Fangu apo burri i motrës së Linda Ramës, me implikimet e kësaj të fundit në bordet e bankave, de facto në përputhje me Kushtetutën, ai nuk është më deputet i Kuvendit të Shqipërisë.

Edi Rama, pasi ka grabitur në mënyrë suksesive votën e shqiptarëve dhe eliminoi pluralizmin politik në parlament, pasi u damkos nga qytetarët e Kosovës si vëllau i Vuçiçit, nga opozita si argat i Beogradit, nga bota si Pashiqi shqiptar, dhe pas fillimit të lëvizjes opozitare pa kthim dje në parlamentin e Shqipërisë, ai urdhëroi prokurorët e tij mercenarë, të denoncuar publikisht në këtë sallë, për fshehje dokumentesh, për manipulim dosjesh, për bashkëpunim me krimin dhe bandat, për të lëshuar urdhër në kundërshtim me Kushtetutën, nenin 73 të saj, i cili përcakton se liria e deputetit në çdo formë, lëvizje, nuk mund të cenohet pa miratimin e parlamentit.

Por, duke qenë autor i një propozimi të tillë në vitin 2012, që ky nen të hiqet, unë pranoj plotësisht sfidën.

Pra, as kufizimi im për të lëvizur në Shqipëri, unë jam deputet dhe duhet të takohem me zgjedhësit, të cilët sot ndjehen më Sali Berishë se kurrë.

As kufizimi im për të lëvizur në Europë, nuk mund të ndodhte kurrë pa miratimin e komisioneve parlamentare.

Por në vendin ku prokuroria është thjesht një seksion i PS, mund të merret çdo vendim./ CNA