Rama: Shqipëria më pranë se kurrë BE, 2026 do të sjellë më shumë transformim

31 Dhjetor 2025, 20:01, Politikë CNA

Rama: Shqipëria më pranë se kurrë BE, 2026 do të

Kryeministri Edi Rama iu drejtua qytetarëve me një mesazh në vigjilje të ndërrimit të viteve, duke theksuar se Shqipëria mbyll vitin me arritje të rëndësishme në procesin e integrimit europian dhe në transformimin e vendit.

Ja edhe një vit tjetër mbërriti tek dera për të dalë, duke e lënë Shqipërinë më lart, se në ditën kur hyri.

Gjatë rrugëtimit të këtij viti, shumica prej jush, në Shqipëri, Europë, gjetkë nëpër botë, e bekoi përpjekjen e përbashkët të dekadës së fundit, duke i dhënë qeverisë sonë, fuqinë e jashtëzakonshme të 83 mandateve.

Faleminderit edhe njëherë nga unë sot, për atë fuqi me të cilën falë jush, unë dhe të zgjedhurit tuaj do të bëjmë për Shqipërinë, në katër vitet e ardhshme, gjithçka duhet që ta ngremë flamurin tonë kombëtar, në oborrin e Shtëpisë së Bashkimit Europian.

Në fjalimin e tij, Rama u shpreh se Shqipëria ka hyrë në një fazë të re zhvillimi, duke e cilësuar dekadën e fundit si një periudhë ndryshimesh të thella në infrastrukturë, turizëm, energji, digjitalizim dhe marrëdhënie ndërkombëtare. Ai nënvizoi se vendi renditet tashmë si “front-runner” në procesin e integrimit të Ballkanit Perëndimor në Bashkimin Europian, me negociatat e anëtarësimit të hapura në të gjitha kapitujt.

Në një dekadë kemi bërë çfarë nuk imagjinohej kur nisi numërimi i viteve tona në qeverisje.

Kemi bërë realitet një Shqipëri tjetër, ku këtë vit u mblodhën krejt udhëheqësit e Europës Demokratike, nga Parisi në Ankara, dhe nga Kievi në Londër për të diskutuar të nesërmen e kontinentit tonë.

Një Shqipëri tjetër, ku për 18 muaj do të mblidhen të gjithë udhëheqësit e NATO-s, për Samitin vjetor të Aleancës, që plot vende të tjera, të cilat kanë hyrë në NATO, kohë përpara nesh, ende s’e kanë patur privilegjin ta mikpresin, tha Rama.

Kryeministri vuri në dukje zhvillimin e infrastrukturës rrugore, rritjen e turizmit në të gjithë vendin, si dhe rolin e platformës e-Albania, e cila sipas tij u ka kursyer qytetarëve qindra milionë euro dhe mijëra vite pritje në sportele. Rama përmendi gjithashtu forcimin e mbrojtjes kibernetike dhe përparimet në sektorin energjetik, me synimin e arritjes së sovranitetit energjetik brenda këtij mandati.

Të gjithë këtë transformim, që vazhdon e do të vazhdojë pa ndalim, me kantiere të hapura e projekte të reja, drejt Shqipërisë 2030 në Bashkimin Europian, nuk e solli koha siç thonë disa, nuk e sollën as alienët apo bandat siç bërtasin disa të fantaksur të tjerë, po e solli forca jonë qeverisëse, besimi juaj tek ne dhe besimi ynë i përbashkët tek Shqiperia, e solli puna pa orar e mijëra e mijëra njerëzve, e ministrisë, agjencive shtetërore dhe kompanive private, përpjekja e madhe në shumë frontet e betejës për Shqipërinë Europiane, ku të metat, dobësitë, gabimet apo edhe rrëshqitjet ose mëkatet e disave brenda nesh, nuk e zvogëlojnë dot kurrsesi përmasën historike të një transformimi të tillë.

Kjo është një Shqipëri tjetër, edhe falë kthimit të infrastrukturës digjitale nga një dorë kioskash me internet, në një shtyllë qeverisëse me maturitet të lartë, siç e vlerësojnë organizmat më prestigjozë ndërkombëtarë të fushës.

Të gjithë këtë transformim, që vazhdon e do të vazhdojë pa ndalim, me kantiere të hapura e projekte të reja, drejt Shqipërisë 2030 në Bashkimin Europian, nuk e solli koha siç thonë disa, nuk e sollën as alienët apo bandat siç bërtasin disa të fantaksur të tjerë, po e solli forca jonë qeverisëse, besimi juaj tek ne dhe besimi ynë i përbashkët tek Shqiperia, e solli puna pa orar e mijëra e mijëra njerëzve, e ministrisë, agjencive shtetërore dhe kompanive private, përpjekja e madhe në shumë frontet e betejës për Shqipërinë Europiane, ku të metat, dobësitë, gabimet apo edhe rrëshqitjet ose mëkatet e disave brenda nesh, nuk e zvogëlojnë dot kurrsesi përmasën historike të një transformimi të tillë.

Kjo është një Shqipëri tjetër, edhe falë kthimit të infrastrukturës digjitale nga një dorë kioskash me internet, në një shtyllë qeverisëse me maturitet të lartë, siç e vlerësojnë organizmat më prestigjozë ndërkombëtarë të fushës.

Duke iu referuar mbështetjes së qytetarëve në zgjedhje, Rama falënderoi shqiptarët për besimin e dhënë dhe garantoi se reformat dhe projektet transformuese do të vijojnë pa ndalim. Ai theksoi se “koha e re e Shqipërisë nuk kthehet më mbrapsht” dhe se e ardhmja do të sjellë rezultate edhe më të mëdha për vendin.

Në mbyllje të mesazhit, Kryeministri uroi qytetarët kudo ku ndodhen për shëndet, mbarësi dhe një vit të ri sa më të begatë./CNA