Projektligji për Bankën Shqiptare të Zhvillimit/ PS pro, PD kundër nismës

17 Mars 2025, 12:15, Politikë CNA

Projektligji për Bankën Shqiptare të Zhvillimit/ PS pro, PD

Sot në seancën plenare në Kuvend po vijon diskutimi për disa prej çështjeve të ditës, ndërmjet tyre edhe projektligji për ngritjen e Bankës Shqiptare të Zhvillimit. Mesa duket, nga diskutimet e deritanishme, Partia Socialiste është pro, ndërsa Partia Demokratike është kundër nismës ligjore.

Ministrja e Shtetit për Sipërmarrjen dhe Klimën e Biznesit, Delina Ibrahimaj, në fjalën e saj theksoi se qëllimi kryesor i bankës do të jetë nxitja e zhvillimit ekonomik të vendit, me fokus në sektorët e nënfinancuar.

“Krijimi i një institucioni të tillë mund të ndihmojë në përthithjen dhe shpërndarjen efektive të fondeve të BE-së, duke siguruar që investimet të drejtohen në projekte me rritje afatgjatë. Sot jemi përpara një momenti historik në anëtarësimin në BE dhe do të ketë fonde në dispozicion dhe duhet të ketë institucione që të kenë aftësinë që t’i përthithin këto fonde.

Qëllimi kryesor i kësaj banke është të nxisë zhvillimin ekonomik të vendit përmes lehtësimit të qasjes në financë të sektorëve të nënfinancuar duke mbështetur zhvillimin e infrastrukturës, eksportet dhe projektet strategjike për ekonominë. Struktura kapitale është projektuar për të siguruar qëndrueshmëri afatgjatë.

Shteti do të zotërojë minimalisht 51% të aksioneve duke ruajtur kontrollin publik, ndërsa institucionet financiare ndërkombëtare dhe vendase mund të kontribuojnë në kapital. Banka do të sigurojë financime përmes financimeve, përmes bashkëpunimeve si Banka Europiane e Zhvillimit apo vendeve anëtare”,-tha Ibrahimaj.

Nga ana tjerër, PD është shprehur kundër këtij projektligji. Deputeti Bujar Leskaj, në fjalën e tij në Kuvend, tha se ky projekt ka rrezik të lartë të klientelizmit dhe rrezikon buxhetin e shtetit.

"Evidentohen një sërë problemesh për stabilitetin e tregut bankar. Mungesa e mekanizmit për kontrollin e këtij projekti. Projekte të paqëndrueshme ekonomikisht, që nuk sjellin rezultate në këto fusha. Mund të krijojë një borxh të akumuluar që mund të ishte një taksë te shqiptarët për ta paguar. Nga përvoja rezulton se janë oligarkët ata që përfitojnë me bizneset e tjera. Tjetra është krijimi i një krize ekonomike si pasojë e kësaj.

Ka dhe rrezik të lartë të klientelizmit. Kemi një praktikë dhe kujtim të keq në këtë sektor bankar, 3 banka të para shtetërore falimentuan apo u privatizuan. Të tre shembujt i kemi negativë në këtë drejtim. Kjo rrezikon edhe buxhetin e shtetit njëkohësisht dhe do rëndojë te xhepat e shqiptarëve",-tha Leskaj./CNA