Privatizimi i ish-kompleksit "Partizani"/ Majko i përgjigjet Argita Malltezit: E kam kundërshtuar gojarisht si ministër i Mbrojtjes

31 Tetor 2023, 13:23, Politikë CNA

Privatizimi i ish-kompleksit "Partizani"/ Majko i përgjigjet

Pandeli Majko

Ish-ministri Pandeli Majko ka reaguar për çështjen e privatizimit të ish-kompleksit "Partizani", për të cilën është vendosur masa "detyrim paraqitje" për ish-kryeministrin Sali Berisha dhe masa "arrest me burg" për Jamarbër Malltezin.

Ai shprehet në një postim në rrjetet sociale se ka kundërshtuar angazhimin për privatizimin e klubit “Partizani”, por theksoi se këtë gjë e ka bërë gojarisht dhe jo me shkresë.

Ky reagim i Majkos vjen pas deklaratave të Argita Malltezit një ditë më parë, e cila në një dalje televizive tha se ish-ministrat Anastas Angjeli, Blendi Klosi dhe Pandeli Majko kanë shkëmbyer komunikime me njëri-tjetrin në lidhje me privatizimin e ish-kompleksit “Partizani”.

"E vërteta është se kam kundërshtuar (jo me shkresë), që të angazhohesha për privatizimin e Klubit “Partizani”. Vec arsyeve të tjera (doja që Klubi të ishte në pronësinë e ministrisë përgjegjëse për sportet), gojarisht kam komunikuar me kolegët, se nuk mund të bëhej një akt i tillë pasi Partia Socialiste sapo kishte humbur zgjedhjet politike të vitit 2005. Ishim në një fazë tranzicioni, të ndryshim qeverisjes. Para zgjedhjeve, si ministër i mbrojtes, kisha nxjerrë një urdhër që ndalonte cdo akt apo kontratë të rëndësishme të përmbyllej në atë periudhë zgjedhjesh politike", shprehet ndër të tjera Majko.

Në reagimin e tij, Majko përmend edhe Panajot Panon dhe brezin e tij, ku thekson se po të ishin gjallë nuk do na falnin shkatërrimin e klubit “Partizani".

Reagimi i plotë:

EDHE PER PARTIZANIN E PANAJOT PANOS/ Nga media po shoh komente kontradiktore lidhur me faktin se procesi i privatizimit të Klubit “Partizani" ka filluar në periudhën e qeverisjes së Partisë Socialiste.
Dje, për këtë cështje është aluduar se jam angazhuar zyrtarisht (me shkresa), në këtë cështje si ministër i mbrojtjes i qeverisjes socialiste, deri në vitin 2005. Shih linkun https://www.cna.al/.../argita-malltezi-zbulon-komunikimet...
Ndërkaq, para disa ditësh, pasardhësi im, si ministër në qeverisjen e PD, zoti Mediu, ka deklaruar se "indicja" e privatizimit të Klubit “Partizani” ka filluar pasi ai është detyruar të kthejë një përgjigje të pakthyer nga ana ime, ndaj zotit Angjeli që u zëvendësua nga zoti Genc Ruli… Shih Linkun https://www.syri.net/.../fatmir-mediu-procesin-e.../
Tani, ose njëra, ose tjetra, janë të vërteta! Të dyja nuk shkojnë bashkë!
E vërteta është se kam kundërshtuar (jo me shkresë), që të angazhohesha për privatizimin e Klubit “Partizani”. Vec arsyeve të tjera (doja që Klubi të ishte në pronësinë e ministrisë përgjegjëse për sportet), gojarisht kam komunikuar me kolegët, se nuk mund të bëhej një akt i tillë pasi Partia Socialiste sapo kishte humbur zgjedhjet politike të vitit 2005. Ishim në një fazë tranzicioni, të ndryshim qeverisjes. Para zgjedhjeve, si ministër i mbrojtes, kisha nxjerrë një urdhër që ndalonte cdo akt apo kontratë të rëndësishme të përmbyllej në atë periudhë zgjedhjesh politike.
Mirëkuptoj cdo lapsus, por në cdo rast dëshiroj të sqaroj, se pavarësisht kundërshtimit tim, procesi (në tentativë) i nisur në qeverisjen socialiste nuk vinte në diskutim ekzistencën e Klubit “Partizani” por kalimin e menaxhimit tek sponsori i Klubit! Ky Klub kishte peshën e Juventusit apo Realit të Madridit në historinë e futbollit shqiptar! Ai ishte pjesë e kujtesës kolektive që na bën këta që jemi!
Panajot Pano dhe brezi i tij, po të ishte gjallë nuk do na e falte shkatërrimin Klubit “Partizani", i cili ishte një pasuri publike dhe pjesë e historisë së Shqipërisë. Ky klub sportiv, sot ekziston vec falë insjativës private.
Panajot Panos dhe shokëve të tij, ja kemi borxh ndjesën. Ata lanë pas një histori që vlen të kujtohet për “pronarët" e futbollit shqiptar.
Ju prishën fushën, ku u bënë ata që ishin! Edhe nga fotot bardh e zi, na buzëqeshin për të na kujtuar se…historia nuk është vec pallat! Sigurisht!/CNA