web counter
LEXO PA REKLAMA!

SHKARKO APP

App Store
Google Play

Me letër në dorë, Meta merr në mbrojtje opozitën

31 Tetor 2023, 11:40, Politikë CNA

Me letër në dorë, Meta merr në mbrojtje opozitën

Kreu i Partisë së Lirisë, Ilir Meta, është shfaqur ditën e sotme në një konferencë për mediat ku me letër në dorë ka folur për disa çështje dhe ka dalë në mbrojtje të opozitës.

Ai theksoi se parlamenti është kapur për fyti nga qeveria dhe se po i bllokon projektligjet opozitës me qëllim asgjësimin e saj.

Gjithashtu vuri në dukje dhe se parlamenti po i imponon zgjedhjen e anëtarëve të Reformës Zgjedhore.

"Parlamenti është kapur për fyti nga Kryeministri me qëllimin e vetëm bllokimin e llogaridhënies dhe shndërrimin e Parlamentit në një zyrë të qeverisë, i cili miraton ligje me porosi.

Bllokimi I të gjitha komisioneve hetimore, për koncesionet, për rrëmbimin e të dhënave të TIMS, çështjen McGonigal, etj., është dëshmi e pakundërshtueshme e qëllimit të qeverisë për të mos dhënë llogari në Parlament.

Përjashtimi në vazhdimësi i deputëtëve të opozitës, dhe së fundmi i 23 deputetëve të saj është një mjet agresioni i hapur ndaj opozitës që të ajo të asgjësohet në funksionin e saj dhe të vërtetat e mëdha të korrupsionit të qeverisë të mos njihen nga shqiptarët.

Dhunimi i shfrenuar i funksionimit të Parlamentit ka arritur deri aty, sa t'i imponojnë opozitës edhe anëtarët e komisioneve parlamentare. Siç është rasti i Komisionit të Reformës zgjedhore, me qëllimin e vetëm, për të bërë një pseudoreformë që legjitimon manipulimin dhe vjedhjen e zgjedhjeve.

Edhe kur opozita propozon nisma ligjore për qytetarët, ato shqyrtohen me shumë vonesë.

Bllokimi i projektligjeve të opozitës, të cilat janë vetëm në interes të qytetarëve, është një mjet tjetër presioni ndaj opozitës në Parlament.

Dje, në mënyrë flagrante vetëm pas 20 muajsh u diskutua dhe NUK u pranua nga mazhoranca propozimi i Partisë së Lirisë për uljen e çmimit të karburanteve.

Ndërkohë mbeten pa u shqyrtuar dhe dhjetëra ligje të tjera që Partia e Lirisë dhe opozita në tërësi kanë propozuar në Parlament.


Jemi në kushtet e një konfrontimi të hapur midis qëndrimit demokratik që ka opozita dhe regjimit të Edi Ramës.

Edi Rama dhe qeveria duan një Shqipëri pa opozitë, që të vënë në zbatim të papenguar, planet e tyre korruptive për interesat e veta, dhe të grupimeve financiare, mafioze që përfaqësojnë, ndërsa opozita punon për një qeverisje demokratike, ku funksionon llogaridhënia dhe transparenca ndaj qytetarëve, ku funksionon shteti i së drejtës dhe ku të gjithë janë të barabartë para ligjit, dhe asnjë nuk gëzon privilegjin e pandëshkueshmërisë, ashtu siç po ndodh sot për fat të keq për shkak të kapjes të drejtësisë nga qeveria", tha Meta./ CNA





Lajmet e fundit nga