Pretendimet për votat nga diaspora/ Kaso: KQZ të kryejë audit të plotë me ekspertë të pavarur

19 Maj 2025, 14:20, Politikë CNA

Pretendimet për votat nga diaspora/ Kaso: KQZ të kryejë audit

Sekretari për Çështjet Ligjore dhe Zgjedhore në PD, Ivi Kaso, kërkoi sot nga Komisioni Qendror i Zgjedhjeve kryerjen e një auditi të plotë, me ekspertë të pavarur, për të gjithë hapat e procesit të numërimit të votës nga diaspora.

Kaso tha se PD kërkon nga KQZ mosnxjerrjen e asnjë rezultati dhe mosmiratimin përfundimtar të asnjë tabele për diasporën derisa auditi i pavarur të dorëzojë konkluzionet e tij mbi procesin dhe të bëjë transparencë të plotë mbi votën e shqiptarëve.

Në një deklaratë për median, Kaso u shpreh se dështimi katastrofik i këtij procesi ngado, po veçanërisht në Greqi, shpaloset përditë, me prova, para syve të qytetarëve.

“Teksa po numërohen votat e fundit të diasporës, procesi jo vetëm që po bëhet gjithnjë e më shumë qesharak, por qartazi u ka dalë nga duart atyre që projektuan këtë masakër elektorale.

Dështimi katastrofik i këtij procesi ngado, po veçanërisht në Greqi, shpaloset përditë, me prova, para syve të qytetarëve.

– Pas rasteve të panumërta të denoncuara nga bashkatdhetarët tanë, të zarfeve të mbërritur bosh pa fletë votimi, të zarfeve të shpërndarë nga patronazhistë, paradoksalisht këtej numërohen shumë më shume fletë votimi sesa zarfe të ardhur;

– Pas zarfeve të mbërritur për në Qarkun Durrës që përmbanin vota për Gjirokastrën,

– Pasi KQZ ende sot nuk di të na thotë se sa fletë votimi ka vulosur për diasporën, …e sa e sa raste çudirash të tilla,

Ky proces është tashmë i kompromentuar rëndë dhe jo legjitim.

Për më tepër ai reflekton edhe atë që ka ndodhur brenda vendit, nëpërmjet të njëjtit mekanizëm!

Ne sot i kërkojmë zyrtarisht Komisionit Qendror të Zgjedhjeve, kryerjen e një auditi të plotë, me ekspertë të pavarur, për të gjithë hapat e këtij procesi të korruptuar në palcë, duke filluar nga regjistrimi i zgjedhësve, nga prodhimi i fletës së votimit nga jashtë e të çdo hapi tjetër deri në administrimin e fletës së mbërritur dhe në daljen e rezultatit për çdo qark.

Gjithashtu i kërkojmë KQZ-së mosnxjerrjen e asnjë rezultati dhe mosmiratimin përfundimtar të asnjë tabele për diasporën derisa auditi i pavarur të dorëzojë konkluzionet e tij mbi procesin dhe të bëjë transparencë të plotë mbi votën e shqiptarëve.

Ky proces tashmë ka rënë totalisht.

Ne nuk mund të shpëtojmë, për fat të keq, fytyrën e këtij procesi, i cili me këmbënguljen e Partisë Demokratike synonte t'u jepte të drejtën e munguar shqiptarëve jashtë Shqipërisë, por që u korruptua në palcë dhe u disintegrua përpara syve të gjithë shqiptarëve, në sajë të vullnetit të mbrapshtë të kësaj mazhorance!”,-tha Kaso./CNA