E fundit!

10:35 Live Updates

Hijet e Erion Veliajt në protestë

Veliaj përmes Arta Dades refuzon “antimiti...

PD: Fondet e rindërtimit në Durrës si vegël shtantazhimi për manipulimin e votave në zgjedhjet e 2025

22 Tetor 2024, 14:10, Politikë CNA

PD: Fondet e rindërtimit në Durrës si vegël shtantazhimi

Zëdhënësja e Partisë Demokratike, Florjana Garo, në një deklaratë për mediat është shprehur se ndonëse kanë kaluar 5 vite nga tërmeti i 26 nëntorit në 2019, tenderët e rindërtimit në Bashkinë e Durrësit vijojnë.

Sipas Garos fondet e rindërtimin në Durrës po përdoren si vegël për manipulimin e zgjedhjeve të vitit 2025.

Deklarata e Florjana Garos

Pesë vjet kanë kaluar nga tërmeti i 26 nëntorit 2019 dhe po afrojnë zgjedhjet e 2025, por tenderët e rindërtimit në Bashkinë e Durrësit vijojnë.

Kështu, më 16 shtator, Bashkia e Durrësit ka hapur tenderin me objekt “Riaftësim strukturor i Pallatit nr.15, Rruga “Abaz Çelkupa 15”, Rajoni 3 si pjesë e Programit të Rindërtimit.

Tenderin me vlerë 800 milionë lekë e ka fituar bashkimi i kompanive EURONDERTIMI 2000 sh.p.k. & EVEREST sh.p.k. & SHEHU -2AB Konstruksion sh.p.k. Sipas Open Data Albania ky tender është me flamur të kuq për mungesë konkurrence. Pra Eurondërtim, Everest dhe Shehu -2AB kanë qenë të paracaktuara se do të fitonin tenderin, si të vetmet kompani në garë.

Por nuk janë tenderët korruptivë dhe as vjedhja e fondeve publike objekti i kësaj deklarate. Në qindra raste, Departamenti i Antikorrupsionit në Partinë Demokratike i ka denoncuar me detaje abuzimet qindra milionëshe të kësaj bashkie në kuadër të procesit të rindërtimit.

Pyetja është: a janë dhe a po përdoren fondet e rindërtimit si mjet shantazhi për qytetarët gjatë fushatave elektorale dhe para zgjedhjeve?

Tenderi i hapur 8 muaj para zgjedhjeve të vitit 2025 nga Bashkia Durrës, edhe pse kanë kaluar 5 vjet nga tërmeti, nuk dëshmon paaftësi, por babëzi dhe llogari të zyrtarëve të Rilindjes për t’i përdorur fondet e rindërtimit për qëllime elektorale.

Open Data Albania ka hulumtuar shpërndarjen e granteve individuale për Programin e Rindërtimit pas Tërmetit, në muaj të zakonshëm gjatë periudhës 2020-2023, dhe gjithashtu në muajt pjesë e Fushatave Zgjedhore.

Nga granti i rindërtimit ishin parashikuar të përfitonin familjet e dëmtuara nga tërmeti, por një javë para zgjedhjeve të vitit 2021 Bashkia e Durrësit ndryshoi strategji, duke ua kaluar fondin e rindërtimit qytetarëve në llogari bankare.

Një përpjekje e qartë për të ndikuar qytetarët elektoralisht, pra një mënyrë e blerjes dhe manipulimit të votës.

Bashkia Durrës transferoi në prill 2021 mbi 792 milionë lekë grante individuale për rikonstruksione të lehta në banesa duke shkelur kështu Kodin Zgjedhor.

Edhe pse është tërhequr shuma fantastike e 267.8 milionë eurove nga Fondi i Rindërtimit, jo pak qytetarë të Durrësit, në vend të çelësit të shtëpisë kanë marrë çelësat e kashtës.

Në këtë sorollatje të gjatë, herë më bonus qiraje e herë pa të, herë në hotele e herë në shtëpi me qira, një pjesë e atyre që kanë humbur shtëpitë në tërmetin e para 5 viteve, u ka mbetur shpresa e fundit te zgjedhjet e pranverës së ardhshme.

Fondi i lëvruar në shtator për firmat e preferuara të kryebashkiakes socialiste, ka si qëllim që banorëve të rrugës Abaz Çelkupa t’u jepet celësi dhe t’u kërkohet vota.

Për Edi Ramën dhe Emirjana Sakon fatkeqësia e 2019 ka qenë një rast për të shpërblyer financiarisht bandat e Durrësit, që i ndihmuan gjatë zgjedhjeve dhe për të përdorur rindërtimin dhe fondet e tij për të blerë dhe rrëmbyer votat e të mbeturve pa strehë.

Hezitimi apo plani i SPAK për të mos hetuar miliona euro të fondeve të Rindërtimit, në Durrës dhe në të gjithë Shqipërinë, është një tjetër favor që i bëhet qeverisë së korruptuar të Ramës dhe një lëshim për kriminalizimin e vendit./ CNA