web counter
LEXO PA REKLAMA!

SHKARKO APP

App Store
Google Play

E fundit!

x

“Në PS ekziston akoma fryma sovjetike”/ Hasimja me kritika: Opozita të marrë pjesë në ligjvënie

10 Dhjetor 2025, 10:17, Politikë CNA

“Në PS ekziston akoma fryma sovjetike”/ Hasimja me kritika:

Politologu Ermal Hasimja ka deklaruar sot se zhvillimet e fundit tregojnë se brenda Partisë Socialiste ekziston ende fryma sovjetike e angazhimit të drejtuesve më të lartë të saj.

I ftuar në “Syri TV”, Hasimja ndau edhe një koment për opozitën shqiptare, për të cilën tha se duhet të jetë më e pranishme në proceset ligjvënëse.

Sipas politologut, mekanizmi më i mirë për një shoqëri që konstaton probleme është t’i shprehë ato përmes votës.

“Kam përshtypjen që në situata të tilla edhe njerëzit nuk ngopen. Siç nuk ngopen me lekë, nuk ngopen as me vota. Aq më tepër që ne kemi njëfarë tradite në Shqipëri që...

Po thjesht mbani mend atë skenën në podcast-in e Ramës, ku i pyet ato kandidatët me sa përqind do të votoni. Edhe mua më kujtonte ato lajmet e kohës së komunizmit që i kam arritur në fakt. Kur thuhej që u morën 300 kuintalë misër për hektar e kaq asaj, edhe këto angazhimet e kryetarëve të kooperativave që thoshin do bëjmë këtë, do bëjmë këtë, këtë. Stil Stakanovist. Dhe njerëzit angazhoheshin dhe kjo lloj fryme me sa duket në PS ekziston akoma. Kështu që, po nuk besoj që ka ndonjë moment ku do t'i vijë turp dikujt aty brenda për votat që mund të marrë, ose mund t'i grabisë, se për të marrë është tjetër gjë. Kështu që nuk besoj që ekziston ai lloj skrupulli moral, le të themi.

Mekanizmi është i vetëm që ekziston në këtë moment, afatshkurtër, është puna që opozita bën në Parlament. Aty ku propozon ligje, ku propozon amendamente nëpër ligje e të tjera. Kjo është, ose komisionet hetimore pastaj, që mund të kishte dhe në rastin e votave të diasporës, supozojmë. Domethënë kjo është ajo çfarë bëhet në afat të shkurtër. Në afat të gjatë pastaj pjesa tjetër është në dorën e shoqërisë. Në qoftë se ti si shoqëri konstaton që ekzistojnë probleme, jo vetëm këto, por dhe probleme të tjera shumë më të mëdha sesa kaq, është në dorën tënde t'i ndryshosh gjërat duke votuar. Kështu që këta të dy janë mekanizmat. Opozita, detyrën që ka është që të marrë pjesë në procesin ligjvënës.

Domethënë, në qoftë se nuk merr pjesë aty, a ndihmon për ndonjë gjë, a zgjidh ndonjë gjë? Pra, të paktën këtë lloj instrumenti mendoj që opozita duhet ta përdorë maksimalisht. Në qoftë se e bojkoton, ti thjesht i lë hapur dyert tjetrit, por nuk zgjidh gjë.

Thjesht, ajo gjëja që po ndodh është që shqiptarët në njëfarë mënyre janë mësuar me të keqen, e kanë pranuar dhe s'është ndonjë çudi e madhe, se në historinë tonë e kemi pasur kështu që, ne kemi duruar një regjim, regjimi më barbar komunist që ka pasur, ndoshta planeti, të paktën në atë moment historik, se tani ndoshta na e kalon Koreja e Veriut.

Po të paktën në atë moment kemi pasur regjim dhe e kemi, jo vetëm e kemi duruar, por kemi pasur kategori të plota, të tëra njerëzish që, në mënyrë oportuniste, janë përpjekur të përfitojnë nga ai lloj regjimi, ose që e kanë përkrahur. Dhe sot e kësaj dite ti mund të gjesh tek-tuk ishuj të vegjël ose individë të cilët thonë që kemi qenë më mirë atëherë në kohën e komunizmit. Ose që ta thonë edhe në Parlament dhe në studio televizive që komunizmi ka pasur më tepër të mira sesa të këqija. Dhe jo njerëz dosido.

Domethënë, kjo të tregon se kemi disa probleme reale në shoqërinë shqiptare, me raportin që kemi me me të keqen, me raportin që kemi me atë çfarë është e pandershme, e padrejtë, që është e keqe, shkurt. Kështu që nuk është çudi. Natyrisht që kjo nuk vlen për shumicën e shqiptarëve, vlen për një pjesë. Po kur bëhet fjala, kur vjen te zgjedhjet, dhe ti shikon që një pjesë e njerëzve abstenojnë sepse kanë mungesë besimi në tërësi ndaj politikës. Një pjesë tjetër kapen nga sistemi klientelist. Kaq mjafton për të lëvizur balancat. Zgjedhjet nuk fitohen ndonjëherë 99 me 1%”,-tha Hasimja./CNA





Lajmet e fundit nga