KAS duhet të refuzojë fletët e votimit me shenja për të ruajtur votat e kandidatëve, të pastra nga shitblerja

25 Qershor 2025, 14:04, Politikë CNA

KAS duhet të refuzojë fletët e votimit me shenja për të

Pas Blerina Gjylametit dhe Erion Braçes, pretendimeve ndaj rinumërimit që po ndodh në sallën "Fahrie Hoti" iu bashkua edhe Ilir Alimehmeti.

E kjo si për të dëshmuar që nuk janë vetëm kandidatët e PS-së që po angazhohen aktivisht në proces, por ka edhe nga PD-ja.

Nuk dihen pretendimet konkrete të lidhura me nxjerrjen të pavlefshme të fletëve të votimit nga kandidatja Gjylameti, por fletët e votimit të publikuara nga kandidati Braçe ngjasojnë me fletën e votimit të publikuara dje live nga kandidati Alimehmeti.

Ilir Alimehmeti "gjen" live 27 vota që "ia kishin vjedhur" numëruesit e PD-së
25 Qershor, 07:40

Si në rastin e kandidatit Braçe, ashtu edhe në rastin e Alimehmetit, KAS duket se ka vendosur të mos ua quajë votat për ato fletë votimi që kanë shenja të tjera veç kryqit të vendosur në kutinë e dedikuar për të shprehur vullnetin si votues.

"Qan" Erion Braçe/ "Po më vjedhin votat"
24 Qershor, 12:37

Lajmi se edhe Alimehmetit i kanë hequr të njëjtën lloj flete, tregon më së paku se KAS po i trajton të gjithë kandidatët në mënyrë të barabartë.

E kjo është shenjë korrektese.

Pretendimi, pastaj, se KAS po e bën këtë për të ndryshuar listën e fituesve, është delir.

Si mund ta dijë KAS në nisje të rinumërimit se sa vota me shenja si ato të fletëve të Braçes do të dalin në 1.230 kuti?

Lajmi tjetër, që Alimehmeti i bashkohet Braçes për të mos e lënë vetëm, mund të dojë pak më shumë rreshta për t'u shpjeguar.

Gjatë fushatës zgjedhore çdo spot i publikuar nga KQZ orientonte votimin në kutinë përkatëse.

Askush nga KQZ nuk inkurajoi votimin liberal me shenja e shënime ku të mundej.

Dhe ka një arsye edhe për këtë.

Pyetja që lind është: pse një votues vendos të vërë kryqin në anë të emrit të kandidatit dhe jo në kutinë e dedikuar?

Pse është lodhur të jetë i saktë dhe linear me emrin e kandidatit duke vënë kryqin djathtas emrit, kur majtas gjendej kutia e dedikuar për atë qëllim?

Pastaj pse dikujt i është dashur ta nënvizojë emrin e kandidatit, ose ta rrethojë atë, kur mjaftonte kryqi në kutinë përkatëse?

Përgjigjja është e thjeshtë. Është e pamundur të dallosh se kush të ka votuar mes qindra kryqeve të vendosura në të njëjtën kuti, në qindra fletë votimi.

Por mund t'i kërkosh votuesit të identifikuar paraprakisht, që shenjën ta bëjë të dallueshme nga të tjerat.

Kështu votuesi beson se kandidati do ta identifikojë.

Aq më shumë e çuditshme bëhet kur sheh për shembull që në fletët e votimit për kandidatin Braçe, votuesi kishte zgjedhur të vinte si kryqin te kutia, ashtu edhe një kryq tjetër pas emrit të kandidatit.

A ka zbuluar KAS shitblerje votash në emër të Erion Braçes?
24 Qershor, 16:17

A është ky lloj "votimi" votim me kod që i lejon kandidatit të identifikojë votuesin apo familjen që ka votuar për të?

Që të kuptohet përmasa e këtij debati pa argument, por me fotografi që nxirren nëpër rrjetet sociale personale për të sugjestionuar njerëzit, ia vlen të bëhet një eksperiment që nuk i ha askujt më shumë se 15 minuta kohë.

Futuni në “YouTube” dhe ndiqni rinumërimin live në një qendër të rastësishme rinumërimi. Zgjidheni vetë.

Do të shikoni me sytë tuaj qindra fletë votimi të rregullta në atë qendër votimi, thuajse perfekte, nga të gjithë zgjedhësit. Dhe vetëm nëse do të jeni njeri me fat do të arrini të rastisni në 1-2 vota ME SHENJË për Braçen, Alimehmetin ose ndonjë tjetër.

Shqiptarët në këto zgjedhje kanë zbatuar me korrektesë mahnitëse procedurën e votimit.

Përveç rasteve kur duhet të linin shenjë.

E derisa këto vota me shenjë janë aq pak, saqë rregulli për të mos i quajtur ato, nëse nuk do të ekzistonte, do të duhej të shpikej.

Minimumi për t’i mbajtur të pastra nga shitblerja edhe votat për Braçen dhe Alimehmetin.