web counter
LEXO PA REKLAMA!

SHKARKO APP

App Store
Google Play

Sulmet e Ramës ndaj gjyqtarëve dhe prokurorëve/ Pse heshtin ndërkombëtarët, KLGJ dhe KLP?

12 Shkurt 2025, 12:20, Politikë CNA

Sulmet e Ramës ndaj gjyqtarëve dhe prokurorëve/ Pse heshtin

Kryeministri Edi Rama ka filluar një sulm frontal të paprecedentë për një kryetar qeverie ndaj institucioneve të drejtësisë, si SPAK dhe GJKKO dhe prokurorëve e gjyqtarëve të tyre.

Nga ana tjetër, Rama ka marrë në mbrojtje eksponentë të Partisë Socialiste si Erion Veliajn dhe Klotilda Bushkën, ndaj të cilëve rëndojnë akuza penale.

Numri një i qeverisë ka nisur “një luftë” me ato që deri dje i cilësonte si institucionet e drejtësisë që i ndryshuan faqen Shqipërisë në raport me ndëshkimin edhe në instancat më të larta.

Rama udhëzoi këtë të mërkurë Inspektorin e Lartë të Drejtësisë, që të nisë procesin ndaj gjyqtarit të GJKKO-së, Erjon Bani, pasi ky i fundit dha masën “arrest me burg” ndaj Veliajt. Banin e cilësoi kamikaz të PD-së në GJKKO.

Ndërsa për prokurorin Olsi Dado që ka hetuar Erion Veliajn, Rama ka thënë se ka intimiduar dëshmitarët, ndërsa vetë Erion Veliaj ka shkuar edhe më tej duke e cilësuar prokurorin individ pervers, ndërsa akuzat e ngritura ndaj tij i ka cilësuar haluçinante.

Rama nga ana tjetër nuk ka ngurruar t’u kujtojë gjyqtarëve, prokurorëve, përfshirë kreun e SPAK-ut, Altin Dumani, edhe rrogat “e majme” a thua se Rama po i nxjerr nga xhepi i tij ato para.

Në këtë sulm frontal që po u bëhet reformatorëve të drejtësië, pyetja që lind është e thjeshtë.

Ku janë Këshilli i Lartë i Prokurorisë dhe Këshilli i Lartë Gjyqësor?! Pse nuk reagojnë ndaj këtyre sulmeve?

Po ambasadat dhe përfaqësuesit diplomatik në vendin tonë pse heshtin?!

A nuk ishin ata të parët garantë që reforma në drejtësi do të vijonte dhe se gjyqtarët e prokurorët do të ngeleshin të paprekur nga politika?

A nuk e kanë më prokurorët e gjyqtarët mbështetjen e palëkundur të ndërkombëtarëve?!

Kur partitë opozitare sulmonin institucionet e drejtësisë, reagimet ishin të shpejta si nga diplomatët që dënonin sulmet, ashtu edhe nga KLGJ dhe KLP, të cilët kërkonin pavarësinë e Gjyqësorit nga politika. Për rikujtesë po sjellim vetëm një prej mesazheve të shumta mbështetëse që i janë bërë SPAK-ut. Në 17 prill 2024, KLP reagoi ashpër ndaj sulmeve që Berisha i bënte SPAK-ut.

Sulmet e Ramës ndaj gjyqtarëve dhe prokurorëve/ Pse heshtin

“Këshilli i Lartë i Prokurorisë si organ qeverisës e kushtetues i sistemit të akuzës, ndjek me vëmendje çdo reagim publik lidhur me punën e institucionit të prokurorisë dhe në veçanti të Prokurorisë së Posaçme kundër Korrupsionit dhe Krimit të Organizuar.

Në këtë kuadër, Këshilli i Lartë i Prokurorisë ka ndjekur me shqetësim ditët e fundit, deklaratat e subjekteve të veçanta në mediat audio vizive dhe ato elektronike, lidhur me prokurorët e Prokurorisë së Posaçme pranë (SPAK) dhe kreut të saj. Këshilli i Lartë i Prokurorisë, dënon çdo gjuhë urrejtje, shprehje, veprim fyes dhe intimidues që synon të denigrojë në mënyrë të padrejtë figurën e prokurorëve apo të ushtrojë presion ndaj tyre, duke i bërë thirrje gjithkujt të mos cenojë në asnjë mënyrë punën profesionale të prokurorëve të Prokurorisë së Posaçme", thoshte KLP.

I menjëhershëm ishte reagimi i Ambasadës së Shteteve të Bashkuara të Amerikës në Tiranë, e cila asokohe ka vlerësuar qëndrimin dhe dënimin nga ana e KLP-së, lidhur me sulmet që u bënë kundrejt SPAK-ut.

Në reagimin në platformën "X", ambasada e SHBA-së në Tiranë, theksoi se Shtetet e Bashkuara të Amerikës janë në krah të qytetarëve shqiptarë që mbështesin institucionet e reja të drejtësisë.

Sulmet e Ramës ndaj gjyqtarëve dhe prokurorëve/ Pse heshtin

“Përshëndesim dënimin nga KLP-ja të sulmeve të drejtpërdrejta dhe të tërthorta kundër SPAK-ut në ditët dhe javët e fundit. Do të vazhdojmë të qëndrojmë në krah të shumicës dërrmuese të qytetarëve shqiptarë që mbështesin institucionet e reja të drejtësisë dhe rolin kyç që ato luajnë në demokracinë e Shqipërisë. SHBA-ja qëndron në krah të profesionistëve të drejtësisë që respektojnë ligjin dhe do të mbështesë të gjithë ata që kërkojnë t’i japin fund pandëshkueshmërisë”, thuhej në reagimin e Ambasadës së SHBA-së.

Ku është sot SHBA, BE, ambadasat e tjera në vend të cilat kanë investuar për këtë drejtësi të pavarur?! Ku janë isntitucionet e drejtësisë si KLGJ dhe KLP?!

Akuzat e Ramës dhe të Berishës në thelb mbeten të njëjta, ndryshojnë vetëm ngjryat politike, nga selia blu janë zhvendosur akuzat e sulmet në selinë rozë. Reagimi ndaj këtyre sulmeve nuk duhet të jetë me dy standarde!/ CNA





Lajmet e fundit nga