Bushka përdori zyrën e Avokates së Popullit për t'i bërë presion dëshmitares

12 Shkurt 2025, 10:29, Politikë CNA

Bushka përdori zyrën e Avokates së Popullit për t'i

Një nga episodet më interesante të shpjeguara në dosjen prej 366 faqesh, të akuzave ndaj familjes Veliaj-Xoxa, është kërkesa për takim e Klotilda Bushkes dhe një dëshmitareje.

Klotilda Bushka i ka shkuar në institucionin ku punonte dëshmitarja dhe e ka thirrur në takim në zyrën e titullares së institucionit.

Titullarja e institucionit i ka krijuar zonjës Bushka gjithë komoditetet e rastit, duke i vënë ne dispozicion zyrën për bisedën me zyrtaren. Biseda nuk kishte lidhje me objektin e punës së institucionit, por bëhej për hallin personal të zonjës Bushka.

Ngjarja ka ndodhur në zyrat e Avokatit të Popullit. Zyrtarja mikpritëse dhe që i krijon gjithë komoditetin e rastit zonjës Bushka quhet Erinda Ballanca.

“Deklaruesja shpjegon se ndërsa ka qenë në zyrë duke punuar, tek Avokati i Popullit, rreth orës 14:30 është lajmëruar nga shoferi i institucionit, një shtetas i quajtur Tasim, se e kërkonte dikush nga jashtë. Më pas, shoferi i ka thënë që të shkonte te zyra e Avokatit të Popullit. Deklaruesja shpjegon se kur është futur brenda në zyrë, ka gjetur aty Avokaten e Popullit Erinda Ballanca, si dhe shtetasen Klotilda Bushka. Deklaruesja shpjegon se në momentin e parë u përshëndeta me të dyja, më pas, shtetasja Klotilda Bushka i ka shkelur syrin, gjest të cilin ajo (deklaruesja) e ka kuptuar si një sinjalizim për të mos treguar se cfarë më kishte ndodhur gjatë majit dhjetor dhe takimet që kishte pasur.

Pas disa bisedave për tema personale, deklaruesja shpjegon se shtetasja Erinda Ballanca është larguar nga zyra dhe ka mbetur vetëm me Klotilda Bushkën. Kjo e fundit ka nisur ta pyesë nëse ishte më mirë dhe a ishte qetësuar nga situata e krijuar muajin e kaluar. Gjithashtu, Klotilda Bushka e ka pyetur nëse kishte ndonjë shqetësim nga SPAK-u, duke e pyetur nëse ishte thirrur përsëri. Deklaruesja i është përgjigjur se nuk ka pasur asnjë lloj shqetësimi dhe është shumë e qetë.

Në vijim, deklaruesja shpjegon se Klotilda Bushka i ka thënë se kishte një merak me deklarimet në ILDKPKI që ajo vetë po bënte, duke iu referuar faturës që kishte në dosjen e saj të lëshuar nga bashkëshorti i saj Altin Bushka, për aktivitetin NATO 2022 dhe e ka pyetur se kush ka qenë në dijeni për këtë faturë. Deklaruesja i ka thënë se për këtë faturë kishte folur vetëm me Greta Kokalarin dhe më pas po ajo i kishte shkruar Altinit duke i thënë se duhet të bënte një faturë.

Deklaruesja shprehet se meraku i Klotildës ishte nëse kjo bisedë mbi faturën në fjalë ishte bërë apo jo me Adela Kondakçiun, siç edhe në të vërtetë ka ndodhur. Megjithatë, deklaruesja e ka mohuar një gjë të tillë. Në një moment, deklaruesja shpjegon se Klotilda Bushka u shpreh duke thënë se 'Adela na ka sjellë shumë pasoja dhe është një person negativ me të cilin kemi bashkëpunuar'”, – thuhet në dosje.

Ndër të tjera, Ina Goxhaj ka deklaruar se Klotilda Bushka i ka thënë se nëse do thirrej përsëri në SPAK, do të përfaqësohej me një avokat, teksa i ka kërkuar që të mos flasë me njeri.

“Deklaruesja shpjegon se Klotilda i ka thënë 'mos ki merak, për çfarëdolloj gjëje, do na kesh ne. Dhe të lutem mos fol me njeri në telefon'”.

Që të mos fliste në telefon në lidhje me ngjarjen, deklaruesja shpjegon se shtetasja Klotilda Bushka ia ka kërkuar disa herë.

Më pas, deklaruesja shpjegon se shtetasja Klotilda Bushka i ka thënë që nëse do e thërrisnin përsëri në SPAK, ajo nuk duhej të tregonte se si Klotilda ia kishte marrë telefonin.

Klotilda Bushka, shpjegon deklaruesja, e ka udhëzuar që nëse do të pyetej nga organi procedues lidhur me telefonin, duhej të deklaronte se telefonin aktual (atë që i ka dhënë shtetasja Ajola Xoxa) e kishte prej vitesh në shtëpinë e saj dhe thjesht e ka vënë në përdorim kohët e fundit”, – thuhet në dosje.

Në fund, deklaruesja ka treguar se teksa po përshëndetej me Klotildën, kjo e fundit i ka thënë “për çfarëdolloj gjëje që të duhet, qoftë edhe për lekë, na thuaj ”.

Ku do t'i gjente lekët Klotilda Bushka, sa ishte e gatshme të paguante dhe në cilën zyrë shteti do t'ia dorëzonte dëshmitares nëse ajo i jepte pazarin?/ CNA