"Nuk do të bëhemi pjesë e shoqatës së drejtuar nga Veliaj"/ Deklarata e Shoqatës së të Zgjedhurve Vendorë

11 Shkurt 2025, 21:06, Politikë CNA

"Nuk do të bëhemi pjesë e shoqatës së drejtuar nga

Shoqata e Të Zgjedhurve Vendorë ka shprehur sot shqetësimin se po krijohet një perceptim i rremë mbi përfaqësimin e bashkive në vend.

Në një deklaratë për mediat, Shoqata ka ndarë informacionin se bashkitë e opozitës nuk janë pjesë e kësaj fushate.

Shoqata ka kërkuar të ekzistojë transparencë në përfaqësimin e bashkive shqiptare dhe u bëri thirrje organizatave ndërkombëtare dhe donatorëve që të mos bien pre e këtij manipulimi dhe të sigurohen që fondet e tyre të mos përdoren për të favorizuar një strukturë të njëanshme.

“Manipulim i përfaqësimit në nivel vendor: Bashkitë e opozitës nuk janë pjesë e “Shoqatës Kombëtare të Bashkive Shqiptare”

Shoqata e Të Zgjedhurve Vendorë shpreh shqetësimin e saj të thellë lidhur me përpjekjet për të krijuar një perceptim të rremë mbi përfaqësimin e bashkive në Shqipëri.

Informojmë publikun dhe partnerët ndërkombëtarë se “Shoqata për Autonomi Vendore”, e cila deri më tani ka përfaqësuar ekskluzivisht bashkitë e mazhorancës, ka ndryshuar emrin e saj në “Shoqata Kombëtare e Bashkive Shqiptare” (Janar 2025), nëpërmjet një vendimi të njëanshëm dhe pa konsensus.

Ky veprim është një përpjekje për të krijuar idenë e një organizate unifikuese, kur në realitet ajo vazhdon të përfaqësojë vetëm një krah politik, atë të partisë socialiste.

Bashkitë e opozitës dhe të zgjedhurit tanë në 61 bashki nuk janë dhe nuk do të bëhen pjesë e kësaj shoqate të drejtuar nga Erion Veliaj.

Kjo manovër përbën:

- Një përpjekje për manipulim publik dhe ndërkombëtar, duke krijuar një fasadë përfshirjeje që nuk ekziston në realitet.

- Një përpjekje për të përqendruar burimet dhe mbështetjen ndërkombëtare vetëm te nje shoqatë apo një grup bashkish, në dëm të një përfaqësimi të balancuar dhe të drejtë dhe demokratik.

Ftojmë mediat dhe partnerët ndërkombëtarë të jenë të vëmendshëm dhe të kërkojnë transparencë në përfaqësimin e bashkive shqiptare.

Gjithashtu, i bëjmë thirrje organizatave ndërkombëtare dhe donatorëve që të mos bien pre e këtij manipulimi dhe të sigurohen që fondet e tyre të mos përdoren për të favorizuar një strukturë të njëanshme.

Shoqata e Të Zgjedhurve Vendorë mbetet e përkushtuar për një qeverisje vendore transparente, gjithëpërfshirëse dhe të drejtë, ku çdo bashki të ketë një zë të barabartë”, - thuhet në deklaratë./CNA