E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

“Dita e Rinisë pa rini”/ Belind Këlliçi: Shqipëria po përballet me ikje masive

8 Dhjetor 2025, 13:39, Politikë CNA

“Dita e Rinisë pa rini”/ Belind Këlliçi:

Në Ditën e Rinisë, 8 Dhjetor, deputeti Belind Këlliçi ka ngritur alarmin për situatën e të rinjve në vend, duke e cilësuar atë tejet problematike dhe të karakterizuar nga dëshira masive për emigrim.

Sipas Këlliçit, të dhënat e një ankete të Qendrës për Studime Ekonomike dhe Sociale tregojnë se 79% e studentëve shqiptarë shprehin dëshirën të largohen nga vendi, ndërsa 40% e klasës së mesme, shtresa më produktive e shoqërisë, mendon të emigrojë.

Ai theksoi se këto shifra po ndikojnë drejtpërdrejt në arsimin parauniversitar, ku numri i nxënësve është në rënie të vazhdueshme dhe shumë shkolla, veçanërisht në zonat rurale, janë mbyllur. Edhe arsimi i lartë, sipas tij, vuan nga mungesa e cilësisë, duke çuar studentët drejt pasivitetit dhe synimit për të gjetur një të ardhme jashtë vendit.

Këlliçi u shpreh se të rinjtë nuk e shohin diplomën si një mjet për sukses në tregun e punës dhe, sipas tij, mesazhet politike që sugjerojnë emigrimin si zgjidhje, vetëm sa përkeqësojnë situatën.

Në ekonomi, deputeti vuri në dukje se bizneset po përballen me mungesë të fuqisë punëtore, duke u detyruar të kërkojnë punonjës nga vende si India, Bangladeshi apo shtete afrikane. Njëkohësisht, sipas tij, profesionistët dhe zanatçinjtë po bëhen gjithnjë e më të rrallë në qendrat urbane.

Ai shtoi se mungesa e perspektivës ka çuar një pjesë të të rinjve drejt varësisë nga droga apo përfshirjes në aktivitete kriminale, ndërsa organizatat kriminale, siç u shpreh ai, me bekim qeveritar, paraqiten si rrugë e shpejtë për t’u çliruar nga varfëria.

Megjithatë, Këlliçi deklaroi se ka dritë në fund të tunelit, duke theksuar se Shqipëria ka potenciale të mëdha zhvillimi, të cilat mund të shfrytëzohen vetëm përmes reformave të thella dhe angazhimit të të rinjve.

“Shqipëria mund ta shpëtojë veten. Të rinjtë mund ta shpëtojnë veten”, u shpreh ai, duke i ftuar të rinjtë të qëndrojnë dhe të kontribuojnë në vend.

Këlliçi mbylli mesazhin e tij duke uruar 8 Dhjetorin dhe duke përgëzuar të rinjtë që kanë vendosur të vazhdojnë përpjekjet për ta afruar Shqipërinë me standardet europiane.

Deklarata e Belind Këlliçit

Dita e Rinisë pa rini

8 Dhjetori e gjen shoqërinë shqiptare në një situatë tejet problematike sa i takon rinisë.

Shifrat e dëshirës për të emigruar janë në nivele alarmante, ku 79% e studentëve deklarojnë se kanë dëshirë të largohen, nga një anketë e Qendrës për Studime Ekonomike dhe Sociale.

Klasa e mesme, shtresa më produktive e shoqërisë dhe ajo që nxit zhvillimin demografik dhe ekonomik të një vendi, deklaron se ka dëshirë të emigrojë në masën 40%.

Këto shifra tregojnë për një tendencë masive të ikjes, e cila sigurisht që sjell pasojat e saj sociale, ekonomike dhe politike.

Nxënësit në arsimin parauniversitar janë pakësuar, me fenomenin gjithnjë në rritje të shkollave të mbyllura, sidomos në fshat.

Arsimi universitar nuk është në cilësinë e duhur dhe studentët, të cilët do të duhej të ishin të parët të interesuar për ta reformuar, ndihen indiferentë dhe presin rastin të emigrojnë.

Arsimin nuk e shohin të lidhur me tregun e punës dhe diplomën të pavlerë për një jetë të suksesshme.

Xhanëm, cila alternativë u jepet?

Vetë Kryeministri ju premton “pasaportën europiane” si zgjidhje për çdo hall, nëpërmjet largimit.

Kjo situatë ka krijuar problemet e veta të pashmangshme edhe në tregun e punës, në produktivitet, në frenimin e rritjes.

Bizneset në sektorë si ndërtimi, industria apo turizmi po hasen me mungesë të fuqisë punëtore dhe po përpiqen ta marrin atë nga vende të huaja si India, Bangladeshi apo shtete afrikane.

Profesionistët, zanatçinjtë mungojnë në qendrat urbane aty ku ka më shumë nevojë.

Rinia shqiptare është e keqinformuar, e keqorientuar, e dëbuar.

Shumë prej të rinjve kanë përfunduar jo vetëm përdorues të drogës, por edhe ushtarë apo punëtorë krahu të krimit të organizuar, i cili me bekimin qeveritar e shfaq veten si e vetmja shkallë sociale dhe mënyrë e shpejtë për të dalë nga varfëria.

A ka një dritë në fund të tunelit?

Sigurisht që po.

Shqipëria nuk është një vend gjeografikisht i varfër, historikisht i pashpresë apo institucionalisht i destinuar për dështim.

Shqipëria i ngërthen në vetvete energjitë për t’u rinovuar, për t’u rritur, për të ndryshuar.

Kjo sigurisht që do të kërkojë reforma strukturore, por asnjë prej këtyre reformave nuk mund të jetësohet pa një angazhim real, të drejtpërdrejtë dhe me vullnet të lirë të të rinjve.

Shqipëria mund ta shpëtojë veten.

Të rinjtë mund ta shpëtojnë veten.

Me energjinë, talentin, përkushtimin, idealizmin e moshës.

Thjesht duhet t’i bëjnë vetes pyetjet:

Nëse jo sot, kur?

Nëse jo unë, kush?

Gëzuar 8 Dhjetorin, ju të rinj që keni vendosur të vijoni betejën në vendin tuaj e ta bëni Shqipërinë një vend europian!/ CNA