E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Kur Mero Baze akuzonte Amerikën për shkatërrimin e ushtrisë shqiptare…

12 Prill 2025, 11:31, Opinione CNA

Kur Mero Baze akuzonte Amerikën për shkatërrimin e ushtrisë

Në vitin e mbrapshtë ’97, ushtria shqiptare u zhbë brenda tri ditësh duke parathënë katastrofën që do të vinte. Ministri i Mbrojtjes, Safet Zhulali, u arratis papritur e papandehur duke lënë në mëshirë të fatit bashkëkombësit në duar të banditëve me kallashnikovët e rrëmbyer në depot e ushtrisë.

Mero Baze ka shkruar një libër për ato ditë të vështira. Ai mendon se shkatërrimi i asaj ushtrie ishte kryesisht për shkak të amerikanëve. Unë nuk mendoj kështu. Unë mendoj se ishte për shkak të Sali Berishës dhe qeverisjes së tij. Por ku të linte Mero të prekje Berishën…

Ja si ua nxjerr bojën amerikanëve më poshtë në një fragment nga libri i tij “Rreziku amerikan për Shqipërinë” i publikuar me titullin eufemik “Realitete shqiptaro-amerikane”.

*******

Tashmë së fundi, kur ushtria shqiptare duket se u shemb brenda tri ditëve si kuti kartoni, dhe kur ministri i Mbrojtjes u arratis në mënyrë të turpshme drejt Italisë, shumë veta po i rikthehen me hollësi çdo detaji nga prania amerikane në ushtrinë shqiptare, nga afërsia dhe pritja spektakolare që i kanë bërë Zhulalit në SHBA e deri te komentet e fundit që duan të përcillen nga qarqet zyrtare amerikane në shtypin amerikan për t’ia faturuar falimentimin e ushtrisë qeverisë shqiptare.

Është e padiskutueshme që qeveria shqiptare do t’i mbetet borxh historisë së Shqipërisë për ushtrinë që kishte përgatitur, por, personalisht kjo përgjegjësi mund të koncentrohet te ministri i Mbrojtjes dhe gjeneralët e ushtrisë.

Siç u dëshmua, ministri i Mbrojtjes ishte miku më i afërt i zyrtarëve amerikanë, ndërsa ushtria shqiptare ishte më e hapura ndaj këshilltarëve ushtarakë amerikanë, anekdotat për të cilët nuk kanë mbaruar në sallonet diplomatike të Tiranës. Ai u largua nga Shqipëria me një histori të paprecedent dezertimi dhe vetëm pas një muaji u tha shqiptarëve se u largua ngaqë kishte jetën në rrezik, ndërkohë që tre milionë shqiptarë janë ende në rrezik nga ikja e tij dhe dezertimi i ushtrisë.

Sidomos për këtë arsye, Shtetet e Bashkuara të Amerikës nuk mund ta fshehin përgjegjësinë e tyre në shkatërrimin e ushtrisë shqiptare. Ndihma e tyre logjistike dhe profesionale, si dhe reformat ristrukturuese që ata i drejtuan vetë, duket se dështuan plotësisht.

Oficerët e “Traktatit të Varshavës” mundën për tri ditë oficerët dhe ushtarët e armatosur sipas modelit të NATO-s përgatitur nga ekspertë amerikanë. Tashmë duhet pranuar nëse kjo ka qenë paaftësi amerikane për të ristrukturuar ushtrinë shqiptare, apo paaftësi shqiptare për të kuptuar se ku po e çonin ushtrinë shqiptare disa ekspertë dhe atashe ushtarakë, që gjetën në Shqipëri ndoshta vendin më mikpritës në Europë.

Tashmë kur lufta ka plasur dhe ushtria thuajse nuk ekziston më dhe shqiptarët shëtisin rrugëve me “kallashnikov” në krah, askush nuk mund t’i ikë përgjegjësisë./ Marrë nga rrjetet sociale të Ermal Mulosmanit