Kiko trajnon Abun për kryebashkiak!

1 Nëntor 2022, 13:29, Opinione Lutfi Dervishi

Pasi e emëruan kandidat për kryebashkiak, për shkak se më shumë e kalonte kohën jashtë Shqipërisë dhe për më tepër mendjen e kishte te çështjet globale, majmuni Abu vendosi të këshillohej më parë me Kiko Majmunin.

Kiko e priti propozimin me putrat e para.

-Dua që të jem këshilltar që të pranosh këshillat e mia dhe jo këshilltar formal.

– Nuk bëhet llaf- ia ktheu Abu. Unë kam nevojë të njihem në detaje me problematikat vendore këtu. Kam nevojë për mend. Pse dyshon se unë nuk do të pranoj këshillat e tua?

“Ka një traditë jo fort pozitive me këshilltarët në këtë vend- vijoi Kiko. Njëri prej ish-udhëheqësve thoshte se “këshilltarët janë për të vënë në jetë këshillat e mia”, një tjetër ish-udhëheqës ankohej se shpenzonte çdo ditë nga 2-3 orë duke këshilluar tufën e këshilltarëve ndërsa tani kanë një udhëheqës që nuk ka kohë të dëgjoj këshilla se po këshillon botën.

Duhet të kesh parasysh një thënie të vjetër- nisi këshillat e tij Kiko, që tashmë jemi në fushatë elektorale dhe “rrenat më të mëdha thuhen gjatë luftës, pas gjuetisë dhe para zgjedhjeve.”

Disa thonë se kjo thënie është e ish-kryeministrit francez Clemencau, ca të tjerë ia atribuojnë ish-kancelarit gjerman Bismarck, ndërsa një pakicë mendon se është thënie e ish-kryeministrit anglez Churchil. Unë besoj se kjo shprehje ka dalë nga këto troje këtu. Dhe duhet të kesh parasysh se ky vend ndodhet në luftë.

Si në luftë- pyeti Abu- a nuk është në luftë Ukraina?

Ukraina ka vetëm një luftë- vijoi sqarimin Kiko, luftën me Rusinë, ndërsa ky vend vijon të jetë në shtatë luftëra..
1. Lufta ndaj pasojave të tërmetit
2. Lufta ndaj pasojave Covid-it
3. Lufta ndaj pasojave të luftës në Ukrainë
4. Lufta ndaj Iranit
5. Lufta ndaj mediave
6. Lufta ndaj raporteve ndërkombëtare
7. Lufta ndaj hijenave dhe non-gratave.

Si ia del ky popull me gjithë këto luftëra- pyeti Abu- si është puna e çmimeve? A janë të dhunshme protestat?

Janë rritur të gjitha çmimet – u përgjigj Kiko, – karburanti, dridhërat, energjie, produktet e shportës. Të gjitha çmimet janë rritur me përjashtim të bananeve dhe …kafesë.

– Si e shpjegon stabilitetin e çmimit të bananeve ti Kiko?

-Pluhuri i llokumit është më i fortë se graniti.

-Po mos ndryshimin e çmimit të kafesë?

– Këtë më duket e subvencionon qeveria që shqiptarë të rrinë në kafe. Këtu gjysma shesin kafe dhe gjysma pijnë kafe. Po u ngritën nga kafeneja shqiptarët, duhet të japin dorëheqjen menjëherë jo vetëm qeveria në Tiranë, por edhe qeveritë e vendeve përreth.

– Si e shpjegon t’i Kiko pasivitetin e shqiptarëve?

– Janë popull i regjur me padrejtësinë. Mua një padrejtësi më bënë dhe riedukova tri policë bashkiakë në Sarandë.

Derisa të mbarojnë zgjedhjet- nuk dua ta dëgjoj fjalën riedukim ngriti zërin Abu, dhe pasi i hodhi putrën në qafë Kikos, afroi kokën te veshi dhe i pëshpëriti:

– Po të besoj një sekret. E ndiej se kam nevojë për disa riedukime!