E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Budallai që hiqej si i mençur/ Nga Ardi Stefa

4 Janar 2024, 17:06, Opinione Ardi Stefa

Ardi Stefa

Në një qytet jetonte një njeri shumë i zgjuar, gjeni. Në të njëjtin qytet jetonte edhe një budalla.

Një ditë budallai iu afrua të mençurit dhe i kërkoi që t'i tregonte një mënyrë për t'u bërë i zgjuar.

I mençuri pyeti budallain nëse donte të bëhej apo të dukej i mençur, sepse që të bëhej i mençur duhej shumë kohë e punë, ndërkohë që të dukej i mençur ishte më e lehtë.

Budallai u përgjigj se donte që i zgjuari t'i tregonte rrugën e shkurtër për t'u dukur i mençur. Nuk shqetësohej për t'u bërë i mençur.

I zgjuari i tha se në rast se do bëhej i zgjuar ekzistonte mundësia që të bënte gabime, ndërsa në rast se donte të dukej i mençur, nuk do të mund të bënte asnjë gabim.

Budallai filloi të tregonte padurim dhe kërkonte nga i mençuri t'i tregonte mënyrën pa asnjë vonesë!

Kështu, i mençuri i tha që thjesht duhet të mohonte gjithçka që dëgjonte. Në rast se dikush thoshte "Ekziston Zoti", budallai menjëherë duhet të përgjigjej se nuk ekziston.

Budallai pyeti të mençurin: "Duhet të them gjëra të tilla edhe kur nuk di asgjë për temën?"

I mençuri u përgjigj: "Nuk duhet ta vrasësh mendjen fare. Po qe se dëgjon të thonë se X piktor bën piktura të jashtëzakonshme, ti thjesht thuaj që janë plehra. Kërko të të vërtetojnë pse janë të jashtëzakonshme.
Në rast se dëgjon që muzika e Y-it është qiellore, thuaju që muzikë të tillë luajnë edhe në Ferr dhe kërko të të vërtetojnë pse është qiellore.
Në rast se ndonjëri thotë se e ke gabim, përgjigju menjëherë që ti asnjë gabim nuk ke, por zotëron të drejtën dhe të vërtetën absolute dhe kërko të të vërtetojnë se pse e ke gabim.
Në rast se të thonë që po flet përralla, thuaj që po flet vetëm të vërteta dhe kërko të të vërtetojnë pse po flet përralla.
Në rast se të thonë se je fajtor, thuaju që nuk je, por kërkoju të provojnë pse të gjithë janë bashkëfajtorë e bashkëvuajtës.
Në rast se ndonjëri të kërkon të reflektosh, thuaj që të gjithë të tjerët veç teje duhet të reflektojnë dhe kërko të të provojnë se pse duhet të reflektojnë.
Në rast se të kërkojnë të heshtësh, thuaj se veç teje të gjithë duhet të heshtin dhe fol, fol, fol pa hesap dhe gjithmonë moho.
Ti thjesht moho çdo gjë dhe në rast se ndonjëri të kundërshton, sfidoje të të provojë ato që thotë, por pa e lënë të provojë gjë."

Që nga ajo ditë, budallai filloi të mohonte me shpejtësi çdo gjë dhe ngadalë - ngadalë nisi të bëhej i njohur në qytet si i mençur. Dhe të gjithë vrisnin mendjen se si ia kishte dalë të mençurohej...

Ky shekull është, në një farë mënyre, shekulli i budallenjve të të gjitha llojeve.

Dhe themeli i budallallëkut të tyre është mohimi dhe të folurit kudo e pa hesap!

Edhe në Shqipëri!