Ambasada gjermane çel ekspozitën digjitale/ Si mijëra shqiptarë u dyndën për t'u larguar nga regjimi komunist

2 Korrik 2025, 09:44, Kulturë CNA

Ambasada gjermane çel ekspozitën digjitale/ Si mijëra

Ambasada Gjermane në Tiranë ka çelur një ekspozitë digjitale përmes së cilës pasqyrohet se si mijëra shqiptarë mësynë pranë Ambasadës për të kërkuar mbrojtje nga regjimi komunist.

Ekspozita digjitale paraqet imazhe origjinale nga kjo periudhë. Ambasasori gjerman, Karl Bergner, e ka cilësuar si një datë historike.

Bergner shton se përmes ekspozitës përkujtohen viktimat e përndjekjes politike nën sundimin komunist.

Kjo ekspozitë virtuale, theksoi ambasadori, e cila tregon pamje origjinale të asaj periudhe, u prezantua për herë të parë në vitin 2020 me rastin e 30-vjetorit. Për shkak të rëndësisë së ngjarjeve dhe imazheve lëvizëse, është rikthyer sërish në ekspozitën online.

“Mirë se erdhët - Willkommen

Të dashur vizitore dhe vizitorë të ekspozitës sonë virtuale,

ju uroj përzemërsisht mirëseardhjen në hapësirën e ekspozitës sonë digjitale!

Në cilësinë e ambasadorit gjerman në Shqipëri për mua është kënaqësi që me këtë ekspozitë po përkujtojmë një ngjarje të rëndësishme historike: dyndjen e Ambasadës Gjermane në Tiranë, që ndodhi si sot 34 vjet më parë.

Asokohe rreth 5.000 qytetare dhe qytetarë shqiptarë kërkonin strehim në ambasadat e huaja në Tiranë. Në territorin e Ambasadës Gjermane, ndërtimi i së cilës kishte përfunduar vetëm pak muaj më parë, në fund gjendeshin më shumë se 3200 njerëz. Ata donin me çdo kusht të largoheshin nga Shqipëria komuniste nën tiraninë e vet staliniste. Rreziku, që ata kësisoj morën përsipër për vete dhe dhe familjet e tyre, ishte jashtëzakonisht i madh.

Njerëzit ishin në kërkim të lirisë, mirëqenies, në kërkim të një fillimi të ri. Një pjesë mes tyre ishin të frymëzuar edhe nga pamjet e transmetuara në televizion për refugjatët gjermano-lindorë të vitit 1989.

Pas dhjetë ditësh konflikti dramatik u zgjidh. Pas bisedimesh të vështira me palën shqiptare komuniteti ndërkombëtar arriti të kishte sukses - qeveria ra dakord me largimin nga vendi. Ky i fundit ndodhi natën e datës 12 korrik përmes Durrësit në drejtim të Italisë e më pas me tren drejt Gjermanisë.

Ne dëshirojmë që përmes ekspozitës sonë të nderojmë kurajën e të larguarve dhe të përkujtojmë viktimat e përndjekjes politike nën sundimin komunist. Edhe pse ato dhjetë ditë të pushtimit të Ambasadës ishin vetëm një episod i shkurtër, ajo arratisje masive paralajmëroi fillimin e ndryshimit politik në Shqipëri.

Kjo ekspozite virtuale, e cila tregon pamje origjinale të asaj periudhe, u prezantua për herë të parë në vitin 2020 me rastin e 30-vjetorit. Për shkak të rëndësisë të ngjarjeve dhe imazheve lëvizëse, ne kemi vendosur ta hapim sërish këtë ekspozitë online.

Dëshpërimi dhe mungesa e perspektivës, që i shtynë njerëzit asokohe drejt ambasadës, duhet të na jenë paralajmërim për të tashmen dhe të ardhmen: sepse është fjala për lirinë, demokracinë dhe zhvillimin ekonomik të të gjithëve. Kurrë më diktaturë, kurrë më terror dhe tirani!

Shqipëria është sot pjesë e familjes europiane dhe një vend me një proces jo gjithnjë të lehtë transformimi pas vetes. Gjermania do të vijojë të jetë edhe në të ardhmen në krah të qytetareve dhe qytetarëve shqiptarë në rrugën e tyre drejt Bashkimit Europian.

Dhe tani u uroj të gjithë vizitorëve, që duke klikuar përmes ekspozitës sonë të argëtohen shumë e të përftojnë njohuri të reja!

Përzemërsisht,

I Juaji Karl Bergner”, shkruan ambasadori Bergner./ CNA