web counter
LEXO PA REKLAMA!

SHKARKO APP

App Store
Google Play

Ndërtuar dhe përdorur në kundërshtim me ligjin/ Konfiskohet pallati 12-katësh në Tiranë

13 Maj 2026, 09:24, Kronika CNA

Një pallat i ndërtuar dhe i përdorur në kundërshtim me ligjin në rrugën "Llukë Kaçaj" është konfiskuar si rezultat i një aksioni nga Policia e Shtetit, IMT dhe Bashkia Tiranë.

Bëhet me dije se kati i 10-të dhe i 11-të i objektit dhe një pjesë e katit të 12-të, ishin ndërtuar në tejkalim të lejes së ndërtimit. 

Gjithashtu është konstatuar se pallati ishte vënë në shfrytëzim, pa certifikatë përdorimi.

Njoftimi i plotë:

Konfiskohet për interes publik, objekt banimi dhe shërbimi në rrugën “Llukë Kaçaj”, ndërtuar dhe përdorur në kundërshtim me ligjin.

Si rezultat i një aksioni të përbashkët ndërmjet strukturave të Policisë së Shtetit dhe atyre të Inspektoratit të Mbrojtjes së Territorit, Bashkia Tiranë, nëpërmjet Drejtorisë së Monitorimit dhe Zbatueshmërisë së Lejeve të Ndërtimit, ndërmarrë në zbatim të ligjit dhe në mbrojtje të interesit publik, është konfiskuar për interes publik, objekt banimi dhe shërbimi, në rrugën “Llukë Kaçaj”, Njësia Administrative Nr. 4, Tiranë.

Nga verifikimet e kryera rezultoi se ishte ndërtuar në tejkalim të lejes së ndërtimit, kati i 10 dhe i 11 i objektit 9-katësh dhe një pjesë e katit të 12 të tij.

Gjithashtu, u konstatua se objekti ishte vënë në shfrytëzim, pa certifikatë përdorimi.

Referuar Aktit Normativ Nr. 8, datë 01.10.2025, tejkalimi rezultoi mbi pragun ligjor 10% të parashikuar për masën e konfiskimit për interes publik.

Materialet procedurale iu referuan Prokurorisë, për veprime të mëtejshme.

Gjithashtu, specialistët e Sektorit për Hetimin e Krimeve Ekonomiko-Financiare në Departamentin e Policisë Kriminale dhe shërbimet e Komisariatit të Policisë Nr. 4 Tiranë, kanë referuar disa herë materiale procedurale në Prokurori, për shkelje të konstatuara në këtë objekt.

Policia e Shtetit mbetet maksimalisht e angazhuar për të bashkëpunuar ngushtë me të gjitha agjencitë ligjzbatuese të ngarkuara për kontrollin e territorit, me qëllim parandalimin, konstatimin dhe goditjen e rasteve të ndërtimeve të paligjshme dhe krimeve kundër mjedisit në tërësi. /CNA





Lajmet e fundit nga