web counter
LEXO PA REKLAMA!

SHKARKO APP

App Store
Google Play

E fundit!

x

Pothuajse një në katër të punësuar në Europë është emigrant

17 Dhjetor 2024, 08:41, Kosova & Bota CNA

Pothuajse një në katër të punësuar në Europë

Pothuajse një në katër të punësuar në Europë është emigrant. Faktori kryesor për mungesën e krahut të punës në vendet europiane është plakja e popullsisë.

Sipas Organizatës Ndërkombëtare të Punës (ILO), emigrantët luajnë një rol gjithnjë e më të rëndësishëm në tregun e punës në shtetet europiane. Për ekonominë dhe zhvillimin ata janë "të domosdoshëm", konstatohet në raportin (16.12.2024) e ILO-së. Potuajse një në katër të punësuar në Europë është ndërkohë emigrant. Veçanërisht në vendet me të ardhura të larta emigrantët po luajnë një rol gjithnjë e më të rëndësishëm. Në Europën veriore, jugore dhe perëndimore kuota e të punësuarve emigrantë në periudhën 2013 dhe 2022 nga 22,5 për qind është rritur në 23,3 për qind. Si emigrantë konsiderohen të gjithë njerëzit, që punojnë në një vend tjetër dhe jo në atdheun e tyre. "Emigrantët e punës janë të domosdoshëm, për të përballuar mungesën e krahut të punës në mbarë botën dhe për të kontribuuar në zhvillimin ekonomik", tha drejtori i përgjithshëm i ILO-së, Gilbert F. Houngbo.

ILO në këtë grup përfshin si njerëzit në marrëdhënie pune, ashtu edhe emigrantët, që punojnë pa dokumentacion të rregullt në vendin ku kanë emigruar. Në krahasimin global kuota e emigrantëve në raport me popullsinë në marrëdhënie pune në Europë si dhe në Amerikën e Veriut dhe në shtetet arabe është mjaft e lartë.

Punësim i lartë në sektorin e shërbimeve

Këto rajone nga njëra anë janë tërheqës për emigrantët për arsyen se kanë të ardhura dhe standarde të larta, nga ana tjetër në to kërkesa për punëtorë është mjaft e madhe. Faktori kryesor për mungesën e krahut të punës në këto vende është plakja e popullsisë. Emigrantët zënë vendet e punës, kur të punësuarit dalin në pension dhe njëkohësisht me këtë rritet edhe nevoja për punonjës në sektorin e kujdesit për të moshuarit. Kjo pasqyrohet edhe në shifra: Tre të katërtat e njerëzve, që kanë qenë të punësuar si emigrantë në Europë, kanë qenë të punësuar në sektorin e shërbimeve. Ndërsa kuota e popullsisë vendase në këtë sektor është pothuajse gjysma e të punësuarve.

Shkaqet për kuotën e lartë të papunësisë

Në mbarë botën kuota e emigrantëve në raport me forcat e punës në vitin 2022 ka qenë 4,7 për qind. Numri i përgjithshëm i emigrantëve në mbarë botën sipas ILO-së është rreth 284,5 milionë. Rreth 255,7 milionë prej tyre kanë qenë mbi 15 vjeç, pra në moshë pune. Në jetën e punës kanë qenë të angazhuar 167,7 milionë persona – 30 milionë më shumë se në vitin 2013. Kuota e papunësisë tek migrantët me 7,2 përqind është pak më e lartë se tek popullsia vendave (5,2 për qind). Arësyet sipas të dhënave të Organizatës së OKB-së ILO ndër të tjera janë vështirësitë gjuhësore, si edhe mosnjohja e diplomave apo edhe diskriminimi./ DW





Lajmet e fundit nga