E fundit!

16:38 Kronika

Aksident i rëndë në aksin Tiranë-Elbasan/ Betonierja bie nga lartësia, dyshohet për viktima

Një aksident i rëndë është shënuar këtë të mërkurë në aksi...

"Nissan" e "Honda", në bisedime për t’u bashkuar

18 Dhjetor 2024, 09:48, Kosova & Bota CNA

"Nissan" e "Honda", në bisedime për t’u

Prodhuesit japonezë të automjeteve, "Nissan Motor Corporation" dhe "Honda Motor Company", kanë konfirmuar të mërkurën se janë duke diskutuar për një bashkëpunim më të ngushtë, teksa kanë mohuar raportimet se kanë vendosur të bashkohen.

Çmimi i aksioneve të "Nissan"-it u rrit për më shumë se 22 për qind në Tokio, pasi raportimet, që citonin burime të paidentifikuara, thanë se ai mund të bashkohet me "Honda"-n për të formuar grupin e tretë më të madh prodhues të automjeteve në botë, raporton AP. Çmimi i aksioneve të "Honda"-s, në anën tjetër, ra për 3 për qind.

Sipas raportimeve, anëtari i aleancës "Nissan", "Mitsubishi Motors Corporation", është, po ashtu, i përfshirë në bisedime.

Që të tre prodhuesit japonezë të automjeteve njoftuan në gusht se planifikonin të ndanin me njëri-tjetrin komponentë për automjete elektrike, si bateritë, dhe të punonin bashkërisht për programet për ngasje autonome, për t’iu përshtatur më mirë ndryshimeve dramatike në industrinë e automjeteve, të përqendruara rreth elektrifikimit.

Një marrëveshje preliminare ndërmjet "Honda"-s, prodhuesit të dytë më të madh në Japoni, dhe "Nissan"-it, të tretit, u bë e ditur në mars.

Tregtia me aksionet e "Nissan"-it u pezullua, por më pas u kthye pasi kompanitë lëshuan bashkërisht një komunikatë, përmes së cilës thanë se po “shqyrtojnë mundësi të ndryshme për bashkëpunim të ardhshëm, por se nuk është marrë asnjë vendim”.

Një bashkim i kompanive mund të rezultojë në një gjigant me vlerë prej rreth 55 miliardë dollarësh, bazuar në vlerën në treg të të gjithë tre prodhuesve të automjeteve.

Bashkimi i forcave do t’i ndihmonte dy kompanive të rrisnin peshën për të garuar me liderin japonez të tregut, "Toyota Motor Corporation", dhe me "Volkswagen AG"-në e Gjermanisë.

Ngritja e prodhuesve kinezë të automjeteve po e lëkund industrinë në një kohë kur prodhuesit po përballen me telashe në kalimin nga automjetet me lëndë djegëse në ato elektrike.

"Toyota" ka prodhuar 11.5 milionë automjete në 2023-shin, përderisa "Honda" ka nxjerrë në treg 4.2 milionë, ndërsa "Nissan" ka prodhuar 3.4 milionë. "Mitsubishi Motors" ka prodhuar pak më shumë se 1 milion.

Edhe në rast të një bashkimi, "Toyota" do të mbetej prodhuesi më i madh japonez i automjeteve./REL