Firmosi me skuadrën korçare, sulmuesi: Gati për një Skënderbe në nivele të larta

2023-06-12 16:15:00, Sport CNA

Firmosi me skuadrën korçare, sulmuesi: Gati për një

Përveç merkatos, Skënderbeu e ka një sy edhe nga rinovimet me lojtarët që shkëlqyen në Kategorinë e Parë me ekipin korçar.

Një nga lojtarët që do të vazhdojë të jetë pjesë e bardhekuqve edhe në sezonin e ardhshëm në elitë është Gresild Lika. Sulmuesi i avancuar ishte një nga të preferuarit e trajnerit Ivan Gvozdenoviç dhe luajti si titullar në të gjitha sfidat, duke ndihmuar ekipin drejt objektivit Superiore.

I vetëdijshëm që përgjegjësia dhe konkurrenca për sezonin e ri do jetë më e madhe, Lika tregon në një bisedë për “Panorama Sport” se do të japë maksimumin për Skënderbeun. 25-vjeçari ka luajtur më parë në elitë si pjesë e Partizanit, Bylisit dhe Luftëtarit.

“Jam shumë i kënaqur që do të vijoj të jem pjesë e Skënderbeut. Më lumturon fakti që drejtuesit kanë besim tek unë. Kjo më motivon akoma më tepër që të jap maksimumin. Siç e dini, kaluam një sezon të vështirë, pasi Kategoria e Parë është një kampionat, ku nuk mjafton vetëm cilësia, por duhen edhe faktorë të tjerë për të dominuar. Në fund ia dolëm mbanë dhe tani jemi në Superiore. Unë premtoj se do të jap gjithçka nga vetja ime që ta rikthejmë edhe një herë tjetër Skënderbeun në majën e futbollit shqiptar, aty ku i takon të jetë”, ka thënë fillimisht Lika.

Ndërkaq, i pyetur për konkurrencën që do të ketë në ekip, ai deklaroi se ky fakt nuk e tremb. Sipas tij, kjo e motivon edhe më tepër që të japë më të mirën.

“Jam i sigurt se drejtuesit do të sjellin gjatë merkatos së verës shume futbollistë cilësorë dhe rivaliteti për një vend titullari do të jetë i madh. Unë nuk trembem, por do të vazhdoj të stërvitem fort për të qenë në formën optimale. Konkurrenca në ekip është gjë e mirë dhe unë do ta shfrytëzoj gjithmonë shansin tim. E rëndësishme është që të jemi të bashkuar dhe të rikthejmë Skënderbeun në nivele të larta”, përfundoi Lika.

Ndërkohë, drejtuesit vijojnë bisedimet me lojtarët që synohen për t’u afruar në ekip, por deri më tani nga ana e klubit nuk ka ende konfirmime për firmosjen e kontratave të reja.